सिरसा : १ सप्टेंबर – शेतकरी नेते राकेश टिकैत यांनी हरयाणातल्या सिरसामध्ये एक वादग्रस्त वक्तव्य केलंय. ‘उत्तरप्रदेश निवडणुकीसाठी हे लोक एखाद्या मोठ्या हिंदू नेत्याची हत्या घडवून आणतील. त्यानंतर हिंदू – मुस्लीम भेदभावाच्या जोरावर निवडणूक जिंकण्याचा प्रयत्न करतील’ असं राकेश टिकैत यांनी राष्ट्रीय स्वयंसेवक संघ – भाजप सरकारवर निशाणा साधताना म्हटलंय.
सोबतच, करनालमध्ये शेतकऱ्यांवर करण्यात आलेल्या लाठीचार्ज प्रकरणी अधिकाऱ्यांवर ३०२ चा गुन्हा दाखल करण्याची मागणी यावेळी राकेश टिकैत यांनी केलीय. करनालमध्ये घडलेल्या घटनेत आम्हाला सरकारी तालिबानी कमांडर पाहायला मिळाले, असं म्हणत त्यांनी हरयाणा सरकारवर निशाणा साधलाय. सोबतच, हरयाणा सरकारकडून शेतकऱ्यांवर लाठीचार्ज घडवून आणला जात आहे. शेतकरी तुम्हाला कधीच माफ करणार नाहीत, असंही त्यांनी म्हटलं.
शेतकरी आंदोलन संपुष्टात आणण्यासाठी सरकारकडून हरएक तऱ्हेचे प्रयत्न करण्यात आले. या आंदोलना दरम्यान हिंदू – शीख असो किंवा हिंदू – मुस्लीम असो यांना एकमेकांत भिडवण्याचा प्रयत्न करण्यात आला. आता जेव्हाही उत्तर प्रदेशात निवडणुका होतील, आरएसएसचे लोक एखाद्या मोठ्या हिंदू नेत्याची हत्या घडवून आणण्याचं काम करतील. निवडणुकीत हिंदू – मुस्लीम करत उत्तर प्रदेश आणि उत्तराखंडात हिंदू नेत्याची हत्या घडवून आणून यांना निवडणुका जिंकायच्या आहेत, असं टिकैत यांनी म्हटलं.
हरयाणाचे मुख्यमंत्री मनोहर लाल खट्टर सुरुवातीपासूनच शेतकऱ्यांचं आंदोलन रोखण्याचा प्रयत्न करत आहेत. अगोदर हरयाणात शेतकऱ्यांना रोखण्याचा प्रयत्न करण्यात आला. परंतु, शेतकरी मागे हटणार नाहीत. जेव्हापर्यंत आमच्या मागण्या मान्य होणार नाहीत तेव्हापर्यंत आम्ही आंदोलन करत राहू. शेतकरी आंदोलनाचं केंद्र दिल्लीऐवजी हरयाणात वळवावं, असा मुख्यमंत्री खट्टर यांचा प्रयत्न सुरू आहे. त्यामुळे, हरयाणात अशा पद्धतीच्या घटना जाणून – बुजून घडवून आणण्यात येत आहेत. परंतु, आम्ही केंद्राशी निपटण्यासाठी सज्ज आहोत, असंही त्यांनी यावेळी म्हटलं.
