मुंबई: १७ जुलै-मनसेचे अध्यक्ष राज ठाकरे व भाजपचे प्रदेशाध्यक्ष चंद्रकांत पाटील हे दोन्ही नेते आज नाशिकमध्ये असल्यानं पुन्हा एकदा भाजप-मनसे युतीच्या चर्चेला उधाण आलं आहे. विधान परिषदेतील विरोधी पक्षनेते व एकेकाळचे राज ठाकरे यांचे शिलेदार प्रवीण दरेकर यांनी आज याबाबत सकारात्मक वक्तव्य केलं आहे.
आमचे नेते देवेंद्र फडणवीस व चंद्रकांतदादा पाटील यांनी याआधीही मनसेशी युतीबाबत आपली भूमिका मांडली आहे. मनसेनं परप्रांतीयांबाबतची संकुचित भूमिका सोडून द्यावी. तसंच, भाजपची हिंदुत्वाची भूमिकाही मनसेला मान्य असणं गरजेचं आहे, असं आमच्या नेत्यांनी यापूर्वीच सांगितलंय. भारतीय जनता पक्ष हा एक राष्ट्रीय पक्ष आहे. त्यामुळं या पक्षाला व्यापक व सर्वसमावेशक भूमिका अपेक्षित आहे. त्यामुळं या संदर्भात भाजपचे वरिष्ठ नेते निर्णय घेतील. भाजपची भूमिका व राज ठाकरे यांची भूमिका यावर चर्चा होऊ शकते, असं दरेकर यांनी सांगितलं.
शिवसेनेनं भाजपशी काडीमोड घेऊन महाविकास आघाडी सरकार स्थापन केल्यानंतर शिवसेनेला शह देण्यासाठी भाजप हरतऱ्हेचे प्रयत्न करत आहे. मनसेशी जुळवून घेण्याचाही भाजपचा प्रयत्न आहे. मनसेशी युतीबाबत भाजपच्या नेत्यांनी कधीही थेट नकार दिलेला नाही. मुंबई, ठाणे, नाशिकसह राज्याच्या काही जिल्ह्यांत मनसेची चांगली ताकद आहे. विशेषत: महापालिका निवडणुकांमध्ये भाजपला मनसेशी युतीचा फायदा होऊ शकतो. पुढील वर्षी होणाऱ्या मुंबई महापालिकेच्या निवडणुकीत शिवसेनेला मात देण्यासाठी भाजपनं जोरदार मोर्चेबांधणी सुरू केली आहे. मनसेची साथ मिळाल्यास भाजपच्या ”मिशन मुंबई’ला मोठं बळ मिळू शकतं, असा एक अंदाज आहे. त्यामुळंही मनसे-भाजपच्या संभाव्य युतीबाबत राजकीय वर्तुळात व दोन्ही पक्षांच्या पाठीराख्यांमध्येही मोठी उत्सुकता आहे.
