श्रीनगर : ३१ मे – जम्मू- काश्मीरमध्ये दहशतवादी कारवाया थांबण्याचे नाव घेत नाहीयेत. काश्मीरी पंडित राहुल भट यांच्या हत्येवरुन वातावरण तापलं असतानाच दहशतवाद्यांनी आणखी एका हिंदू महिलेची गोळी झाडून हत्या केली आहे.
दहशतवाद्यांनी हत्या केलेल्या महिलेचे नाव रजनी बाला असं आहे असून कुलगाम येथील सांबा परिसरातील ती रहिवाशी आहे. कुलगाम येथील गोपालपोरा येथे ही घटना घडली आहे. गोपालपोरा शाळेत रजनी शिक्षिका म्हणून कार्यरत होती. दहशतवाद्यांनी रजनीवर बेछूट गोळीबार केला. त्यानंतर तिच्या सहकाऱ्यांनी तिला रुग्णालयात दाखल केल. तिथे उपचारादरम्यान तिचा मृत्यू झाला.
रजनीवर झालेल्या गोळीबाराच्या घटनेनंचर सुरक्षारक्षकांनी त्या परिसरात सर्च ऑपरेशन सुरु केलं आहे. या हल्ल्यात सहभागी असलेल्या दहशतवाद्यांची ओळख पटवून लवकरच त्यांना शिक्षा करण्यात येईल, अशी माहिती काश्मीर पोलिसांनी दिली आहे.
महिला शिक्षेकेच्या हत्येनंतर जम्मू- काश्मीरच्या माजी मुख्यमंत्री महबूबा मुफ्ती आणि उमर अब्दुल्ला यांनी दुखः व्यक्त केलं आहे. भारत सरकार काश्मीरमध्ये सामान्य स्थिती असल्याचा दावा करत आहे. तरीही नागरिकांच्या हत्या होत आहेत. ही चिंताजनक बाब आहे, असं म्हणत त्यांनी या घटनेचा निषेध नोंदवला आहे.
