बुलडाणा : १६ मार्च – तहसीलदारांच्या वाहनांवर वाळूमाफियांनी केलेल्या हल्ल्याची घटना ताजी असतानाच काल पूर्णा नदी पात्रात रेतीचा उपसा करून निर्माण झालेल्या खड्ड्यात बुडून अकरा वर्षे मुलाचा मृत्यू झाल्याची घटना घडली आहे.
प्रचंड रेती उपसा केल्याने झालेल्या खड्ड्यात बुडाल्याने मुलाचा मृत्यू झाल्याचा आरोप नातेवाईकांनी व ग्रामस्थांनी केला आहे. या प्रकरणी कारवाईसाठी शेगाव ग्रामीण पोलिसांत धाव घेतली आहे. अनिल भारसाकडे यांचा अकरा वर्षीय मुलगा अर्जुन हा दुपारी पूर्णा नदी मध्ये गेला असता नदीपात्रात यंत्राद्वारे खोदकाम केलेल्या खड्ड्यात पडून त्याचा मृत्यू झाल्याचा प्राथमिक अंदाज वर्तवला जात आहे. ही घटना माहिती पडताच मुलाच्या नातेवाईकांनी नदीपात्रात शोध घेतला.
अर्जुन नदीपात्रात सापडल्यानंतर त्याला शेगाव येथील सईबाई मोटे रुग्णालयात आणले. मात्र, डॉक्टरांनी त्याला मृत घोषित केले. त्यानंतर मुलांचे नातेवाईक व गावकऱ्यांनी शेगाव ग्रामीण पोलीस स्टेशन गाठले व नातेवाईकांनी पोलिसांना घटना कथन करत तक्रार घेऊन त्यांनी संबंधित गुन्हेगारांवर कारवाई करावी अशी मागणी केली.
मुलांच्या नातेवाइकांनी शेगाव ग्रामीण पोलीस स्टेशनच्या प्रवेशद्वारासमोर गुन्हेगारांवर कारवाई झालीच पाहिजे पुन्हा दाखल झालाच पाहिजे, अशी आक्रमक मागणी केली. नातेवाईकांनी घेतलेल्या या आक्रमक पवित्र्यामुळं परिसरात काही वेळ तणाव निर्माण झाला होता. मात्र, पोलिसांच्या प्रयत्नानंतर काहीवेळातच वातावरण शांत झालं.
