चंदीगड : १६ मार्च – पंजाबचे नवे मुख्यमंत्री भगवंत मान यांना शपधविधी सोहळ्याला उशीर झाला. १२.३० वाजता शपथविधीचा कार्यक्रम होता. पण भगवंत मान आणि दिल्लीचे मुख्यमंत्री अरविंद केजरीवाल हे ५० मिनिटं उशिराने शपथविधी सोहळ्याला पोहोचले. हवामान खराब असल्यामुळे मोहालीहून खटकड कला येथे ते वेळेवर पोहोचू शकले नाही, असे सांगण्यात येत आहे. राज्यपालही व्यासपीठार पोहोचले होते. पण त्यांची वाट बघत होते. जवळपास दीड वाजता भगवंत यांनी पंजाबच्या मुख्यमंत्रीपदाची शपथ घेतली.
राज्यपाल बीएल पुरोहित यांनी मान यांना पद आणि गोपनीयतेची शपथ दिली. मान यांनी पंजाबी भाषेत ईश्वराच्या साक्षीने शपथ घेतली. यानंतर त्यांनी भाषण करत इन्कलाब जिंदाबादच्या घोषणा दिल्या. भगवंत मान आता पंजाबचे १७ वे मुख्यमंत्री बनले आहेत. फक्त काही तारखांनाच हुतात्म्यांचे स्मरण का केले जाते? त्यांनी दाखवलेल्या मार्गावर आपण रोज चालले पाहिजे. आम आदमी पक्षाच्या नेत्यांना आणि कार्यकर्त्यांनी कोणत्याही प्रकारचा अहंकार करू नये. मला अशा बातम्या ऐकायला यायला नकोत, असे शपथ घेतल्यानंतर पंजाबचे नवे मुख्यमंत्री झालेले भगवंत मान म्हणाले.
वेळ आणि जनता ही मोठी गोष्ट आहे. माणसाला जमिनीवर आणायला ते उशीर करत नाहीत. बेरोजगारी, भ्रष्टाचार, शेती, व्यवसाय, शाळा, रुग्णालये सर्व काही व्यवस्थित होईल. येथे राहूनच आम्ही पंजाबचे भले करू. आपण जनतेसारखे आहोत आणि जनता म्हणून काम करत राहणार. पंजाबच्या जनतेने २० फेब्रुवारीला कोणताही लोभ न ठेवता मतदान केले. येत्या काळात अभ्यासक्रमात ही घटना विद्यार्थ्यांना शिकवली जाईल, असे मुख्यमंत्री मान म्हणाले.
भगवंत मान यांनी शहीद भगत सिंग यांचे मूळगाव खटकड कलां येथे पंजाबीमध्ये मुख्यमंत्रीपदाची शपथ घेतली. मान यांनी पिवळ्या रंगाची पंजाबी पगडी घातली होती. दिल्लीच मुख्यमंत्री अरविंद केजरीवाल हे यावेळी उपस्थित होते. त्यांनीही पिवळ्या रंगाची पगडी घातलेली होती. यशस्वी विनोदी कलाकार राहिलेल्या भगवंत मान यांनी विशेष म्हणजे २०११ मध्ये याच गावातून राजकीय कारकीर्दीला सुरवात केली होती. मान यांनी समर्थकांना पिवळ्या रंगाची पंजाबी पगडी घालून येण्याचे आवाहन केले होते.
शपविधी सोहळ्याला जवळपास २ लाख नागरिक उपस्थित होते, असा अंदाज आहे. पुरुष पिवळ्या रंगाच्या पगडीत तर महिलाही याच रंगाची ओढणी ओढून शपथविधी सोहळ्याला उपस्थित होत्या. या सोहळ्याला दिल्लीचे मुख्यमंत्री अरविंद केजरीवाल हे आपल्या सर्व कॅबिनेट सह उपस्थित होते. भगवंत मान यांची मुलगी सीरत कौर मान आणि मुलगा दिलशानही या शपथविधी सोहळ्याला उपस्थित होते. मान यांचा २०१५ मध्ये पत्नी इंद्रप्रीत कौर यांच्याशी घटस्फोट झाल होता. शपथविधी पूर्वी मान यांनी ट्विट केले.
शपथविधीसाठी सुमारे १३ एकरमध्ये मंडप उभारण्यात आला होता. ज्यामध्ये ३ व्यासपीठ बनवण्यात आले. नवे मुख्यमंत्री भगवंत मान आणि राज्यपाल बीएल पुरोहित पहिल्या व्यासपीठावर होते. दुसऱ्यावर मुख्यमंत्री अरविंद केजरीवाल आणि त्यांचे मंत्रिमंडळ बसले. तिसर्या बाजूला पंजाबच्या सर्व ११६ आमदारांच्या बसण्याची व्यवस्था करण्यात आली होती. सुरक्षेसाठी सुमारे १०,००० जवान तैनात करण्यात आले होते. सुमारे १०० एकर जागेत शपथविधी सोहळा पार पडला. ज्यामध्ये ४० एकरांवर पार्किंगची व्यवस्था करण्यात आली होती.
