कोल्हापूर : ८ मार्च – आजाराला कंटाळून महाडिक कॉलनी येथील वृद्ध दाम्पत्याने रंकाळा तलावात उडी घेऊन आत्महत्या केल्याची धक्कादायक घटना उघडकीस आली आहे. धोंडीराम बळवंत पाटील (वय ८०) आणि त्यांची पत्नी विजयमाला पाटील (वय ७५) अशी आत्महत्या करणाऱ्यांची नावे आहेत.
जुना राजवाडा पोलिसांनी या घटनेची माहिती दिली. रविवारी रात्री अकरा वाजण्याच्या सुमारास रंकाळा तलावात एका महिलेचा मृतदेह तरंगत असल्याची माहिती अग्निशामक दलाने जुना राजवाडा पोलिसांना दिली. मृतदेहाची ओळख न पटल्याने मृतदेह सीपीआरमधील शवागृहात ठेवण्यात आला. दरम्यान रविवारी सायंकाळी एका पुरुषाचा मृतदेह रंकाळा तलावात तरंगत असलेला आढळून आला. अग्निशमन दलाने हा मृतदेह बाहेर काढून तपासणी केली असता पॅन्टच्या खिशात दोन ओळखपत्रे सापडली. या ओळखपत्रावर त्या वृद्धाचे फोटो व नाव आणि दुसऱ्या ओळखपत्रावर विजय माला पाटील यांचे छायाचित्र आणि नाव होते. पोलिसांनी ओळख पत्रावरून त्यांच्या नातेवाईकांना बोलवले. आई-वडिलांचा मृतदेह पाहून मुले आणि नातेवाईकांनी हंबरडा फोडला. आजाराला कंटाळून त्यांनी आत्महत्या केली असावी, असा अंदाज पोलिसांनी व्यक्त केला आहे.
पाटील यांचे मध्यवर्ती बस स्थानक परिसरात प्रसिद्ध न्यू आनंद सायकल कंपनी हे दुकान होते. पाटील दाम्पत्य मुलांसह महाडिक कॉलनीत राहत होते. काही वर्षांपूर्वी त्यांची मुले पाटोळे वाडी येथे राहण्यास गेली तर धोंडीराम विजयमाला हे वृद्ध दाम्पत्य जाधववाडी येथे भाडेतत्त्वावर राहत होते, अशी माहिती जुना राजवाडा पोलिसांनी दिली.
