बहराइच : २४ नोव्हेंबर – उत्तर प्रदेशातील बहराइच जिल्ह्यात अल्पवयीन मुलीला धमकावून तिच्यावर बलात्कार करणाऱ्या नराधम बापाला कोर्टाने फाशीची शिक्षा सुनावली आहे. कोर्टाने अवघ्या तीन महिन्यांत खटल्याची सुनावणी पूर्ण करून या प्रकरणात निकाल दिला आहे. या प्रकरणात मुलीच्या आईनेच आपल्या पतीविरोधात पोलिसांत तक्रार दाखल केली होती. पीडितेचा भाऊ देखील या प्रकरणात साक्षीदार होता.
बहराइच जिल्ह्यातील सुजौली पोलीस ठाण्याच्या हद्दीत ही घटना घडली होती. ४० वर्षीय आरोपी आपल्या अल्पवयीन मुलीला धमकावून तिच्यावर लैंगिक अत्याचार करत होता. इतकेच नाही तर, मुलगी सज्ञान नसताना, तिचे लग्नही लावून दिले होते. लग्न लावून दिल्यानंतरही आरोपी तिला तिच्या सासरी जाऊ देत नव्हता. याबाबत पीडितेच्या आईला समजल्यानंतर तिने २५ ऑगस्ट रोजी सुजौली पोलीस ठाण्यात आपल्या पतीविरोधात तक्रार दिली. त्यानंतर पोलिसांनी पॉक्सो अॅक्ट अंतर्गत विविध कलमान्वये आरोपीविरोधात गुन्हा दाखल केला.
मिळालेल्या माहितीनुसार, महिलेच्या तक्रारीनंतर पोलिसांनी आरोपीला अटक केली. त्याला कोर्टात हजर केले असता, कोर्टाने त्याची रवानगी कोठडीत केली. वैद्यकीय तपासणीनंतर दुष्कृत्य केल्याचे स्पष्ट झाले. यानंतर पोलिसांनी अगदी कमी वेळात आरोपपत्र दाखल केले. कोर्टात खटला सुरू झाला. सुनावणी झाल्यानंतर न्यायाधीश नितीन पांडेय यांनी हा गुन्हा गंभीर असल्याचे सांगत, आरोपीला फाशीची शिक्षा सुनावली. तसेच ५१ हजार रुपयांचा दंडही ठोठावला.
