नियतीशी झुंज
मार नियति तू किती तडाखे मारायाचे मार
तुझे तडाखे खाउन तुजला मीच करिन गं गार ||
मी न डरतो महामारीला
घाबरतो ना युद्धालाही
चालत राहिन विजय पथावर
करित रहा तू वार ||
किती अजुन तू देशिल चटके
किती मारिशी चाबुक फटके
म्हणेन मी ना नशीब फुटके
मानिन मी ना हार ||
तव वणव्यातून भाजुन निघता
बळकट होईन मी अलबेला
मम भाग्याचा मीच विधाता
तुला करिन मी ठार ||
कधी तुला ना येइन शरण
तुलाच मारून सरेल हे रण
समर्थ करुनी मजला उघडिन
मानव मुक्ती -द्वार ||
कवी -- अनिल शेंडे (९८६०३०७४६२),नागपूर
