यवतमाळ: ६ जानेवारी – येथील वसंतराव नाईक शासकीय वैद्यकीय महाविद्यालयातील रुग्णालयात एका निवासी डॉक्टरवर रुग्णाने चाकूहल्ला केल्याची घटना गुरुवारी रात्री साडेआठ वाजतादरम्यान घडली आहे.
या हल्ल्यात जखमी डॉक्टरला तत्काळ दाखल करून उपचार सुरू करण्यात आले आहेत. या घटनेनंतर संतप्त डॉक्टरांनी सुरक्षेच्या कारणास्तव कामबंद आंदोलनाचा इशारा दिला आहे. डॉ. सॅबिस्टियन (तामिळनाडू) असे जखमी डॉक्टरचे नाव आहे.
आरोपीचे नाव सूरज ठाकूर असून त्याला यवतमाळच्या वैद्यकीय महाविद्यालय रुग्णालयात दाखल करण्यात आले होते. दोन दिवसांपूर्वी आरोपीने स्वतःवर चाकूने वार केले होते. तो मानसिकदृष्ट्या अस्थिर असल्याचे समोर आले आहे. डॉक्टर राऊंडवर असताना आरोपीने त्यांच्यावर चाकूने हल्ला केला. आरोपीला अटक करण्यात आली आहे अशी माहिती, यवतमाळ पोलिसांनी दिली आहे.
मेडिकल कॉलेजमध्ये डॉक्टरवर झालेल्या प्राणघातक हल्ल्याच्या निषेधात आज राज्यभरात निवासी डॉक्टर काळया फिती लावून काम करतील. वर्षभरापूर्वी याच कॉलेजमध्ये एमएमबीएस द्वितीय वर्ष विद्यार्थ्याला परिसरात जबर मारहाण झाली व त्यात त्याचा मृत्यू झाला होता. कालच्या घटनेनंतर यवतमाळ मेडिकल मध्ये निवासी डॉक्टरांनी काम बंद आंदोलन सुरू केले आहे.
आकस्मिक सेवाही बंद करण्यात आल्या आहेत. आज राज्यभरात वैद्यकीय महाविद्यालयांमध्ये निवासी डॉकटर कँडल मार्च काढतील तसेच या घटनेचा निषेध करतील. गरज पडल्यास उद्यापासून आंदोलन तीव्र करण्याचा इशारा सेंट्रल मार्डचे अधक्ष डॉ. अविनाश दहिफले यांनी दिला आहे
