मुंबई : १३ डिसेंबर – राष्ट्रवादी काँग्रेसचे अध्यक्ष शरद पवार यांना जीवे मारण्याची धमकी देण्यात आल्याची माहिती समोर येत आहे. एका अज्ञात व्यक्तीने त्यांच्या सिल्व्हर ओक या निवासस्थानी फोन करुन ही धमकी दिल्याची प्राथमिक माहिती समोर येत आहे. या प्रकरणी ग्रामदेवी पोलिसांनी अज्ञात व्यक्तीविरोधात गुन्हा दाखल केला आहे.
धमकी देणाऱ्या अज्ञात व्यक्तीने सिल्व्हर ओक या निवासस्थानी फोन करुन देशी कट्ट्याने जीवे ठार मारण्याची धमकी दिली आहे. सिल्व्हर ओकवर तैनात असलेल्या पोलिसांच्या फोन ऑपरेटरने पोलिसांकडे यासंबंधित तक्रार दाखल केली आहे. त्या तक्रारीवरुन गुन्हा दाखल करण्यात आला असून पोलिस अधिक चौकशी करत आहेत. सोमवारीच शरद पवार यांचा वाढदिवस साजरा झाला होता. त्यांनंतर आज त्यांना आलेल्या धमकीच्या फोनमुळं मोठी खळबळ उडाली आहे.
पोलिसांनी या फोनची गंभीर दखल घेतली असून फोन करणारा व्यक्तीची ओळख पटवली आहे. या व्यक्तीने हिंदीतून ही धमकी दिली आहे. तसंच, धमकी देणारा हा तरुण मनोरुग्ण असल्याची माहिती समोर येत आहे. राष्ट्रवादी काँग्रसच्या कार्यालयाकडून हा दावा करण्यात येत आहे. प्राथमिक माहितीनुसार धमकीचा फोन बिहारमधून आला होता.
पोलिसांनी या व्यक्तीविरोधात भादंवि कलम २९४, ५०६ (२)अंतर्गंत गुन्हा दाखल करण्यात आला आहे. या पूर्वीही याच व्यक्तीने पवारांना धमकी दिली होती. त्यावेळी त्याला पोलिसांनी ताब्यात घेऊन चौकशी केली होती आणि समजूत घालून सोडून दिले होते. आता पुन्हा एकदा त्याच व्यक्तीने धमकी दिली आहे, अशी माहिती सूत्रांनी दिली आहे. फोन करणाऱ्या व्यक्तीचे मानसिक स्वास्थ ठीक नाहीये. त्याने याधीही असे प्रकार केले आहेत, असं राष्ट्रवादीच्या कार्यालयाकडून सांगण्यात येत आहे.
