नवी दिल्ली : ५ डिसेंबर – मागील बऱ्याच दिवसांपासून राष्ट्रीय जनता दल पक्षाचे नेते लालूप्रसाद यादव आजारी आहेत. आज (५ डिसेंबर) त्यांच्यावर किडनी प्रत्यारोपणाची शस्त्रक्रिया यशस्वीरीत्या पार पडली आहे. . विशेष म्हणजे लालूप्रसाद यांना त्यांची मुलगी रोहिणी आचार्य यांनी लालूप्रसाद यादव यांना त्यांची किडनी दिली आहे. आज ही प्रत्यारोपण प्रक्रिया पार पडली आहे. खुद्द रोहिणी आचार्य यांनी याबाबतची माहिती दिली असून रुग्णालयातील काही फोटो शेअर केले आहेत.
मागील बऱ्याच दिवसांपासून लालूप्रसाद यादव वेगवेगळ्या आजारांशी लढत होते. त्यांच्यावर किडनी प्रत्यारोपणाची शस्त्रक्रिया केली गेली आहे. ही शस्त्रक्रिया आज सिंगापूरमध्ये करण्यात आली. सर्व चाचण्या केल्यानंतरच या शस्त्रक्रियेला परवानगी देण्यात आली होती. रोहिणी आचार्य सिंगापूरमध्ये राहतात.
मिळालेल्या माहितीनुसार आपल्या मुलीकडून किडनी घेण्यास लालूप्रसाद यादव तयार नव्हते. मात्र रोहिणी यांनी त्यांची समजूत काढल्यानंतर त्यांनी या शस्त्रक्रियेस सहमती दर्शवली. सिंगापूरमधील सेंटर फॉर किडनी डिसीज येथे लालूप्रसाद यादव यांच्यावर ही शस्त्रक्रिया पार पडली आहे.
