पाटणा : २९ नोव्हेंबर – ‘भारतात राहत असलेले सर्व नागरिक मूलत: हिंदू आहेत. हिंदुस्थानात वास्तव्य करत असल्यानेही ते हिंदूच आहेत. त्यांची आजची ओळख काहीही असली तरी भारताच्या स्वीकार्हार्हतेच्या संस्कृतीमुळेच ती त्यांना मिळाली आहे, हे त्यांनी ध्यानात घ्यावे. शतकानुशतकापूर्वीच्या संस्कृतीचे नावच हिंदुत्व आहे’, अशी भूमिका सरसंघचालक मोहन भागवत यांनी सोमवारी दरभंगा येथे मांडली.
भागवत यांनी चार दिवसांच्या बिहार दौऱ्याची सांगता करण्यापूर्वी संघाच्या कार्यकर्त्यांशी संवाद साधला. भारतमातेची स्तुती करण्यासाठी संस्कृत श्लोकाचे पठण करणे मान्य असणारा आणि या भूमीच्या संस्कृतीचे रक्षण करण्यास कटिबद्ध राहणारा प्रत्येक जण हिंदू आहे, असे त्यांनी नमूद केले. ‘हिंदू संस्कृती ही मुळातच सामावून घेणारी आहे, त्यामुळे आज वेगवेगळी ओळख सांगणारी आणि एकमेकांविरोधात उभी ठाकलेली मंडळी दिसत असली तरी प्रत्येकाने आपल्या सुरुवातीपर्यंत मागे डोकावल्यास एकच मूळ दिसून येईल’, असे ते म्हणाले. ‘स्वतःला इतरांमध्ये पाहणे, स्त्रियांकडे उपभोगाची वस्तू म्हणून नव्हे तर माता म्हणून पाहणे आणि इतरांच्या मालकीच्या संपत्तीची लालसा न करणे ही मूल्ये हिंदू धर्माची व्याख्या स्पष्ट करतात’, असे त्यांनी नमूद केले.
