नागपूर : २४ नोव्हेंबर – नयाकुंड जवळील सुत गिरणीजवळ कार व ट्रकची धडक झाली. त्यात एक जण जखमी झाला होता. त्या घटनेचा मौका पंचनामा सुरु असताना एक भरधाव कार घटनास्थळी आली व तिने आठ लोकांना उडविले. यात एक पोलीस मृत्युमुखी पडला, तर सात जण जखमी झाले आहेत.
जयंत विष्णू शेरेकर (४२, राहणार रनाळा ,कामठी) असे मयत पोलिसाचे नाव आहे. तो पारशिवणी पोलीस स्टेशन येथे कार्यरत आहे. चंद्रप्रकाश टेकाडे (३२, सूतगिरणी, नयाकुंड), अमोल कनोजे (३०, पारशिवणी), विक्रमसिंग भैस (४५, नयाकुंड), आकाश कोलांडे (२५, मेहंदी), संदीप तिजारे (३५, मेहंदी), गौरव पणवेलकर (३२, पारशिवणी), सागर सायरे (३८, पारशिवणी) हे जखमी आहेत.
जखमींना नागपूर येथील मेडिकल हॉस्पिटल येथे हलविण्यात आले आहे. आमडी फाटा ते पारशिवणी रस्त्यावरील नयाकुंड येथील सुतगिरणी पासून एक किमी अंतरावर सदर अपघात घडला. सुरुवातीला आमडी फाटा कडून कार पारशिवणी कडे येत होती. अशातच पारशिवणी कडून आमडी फाटा कडे जाणाऱ्या ट्रकने कारला धडक दिली. ही घटना ८.१५ वाजता घडली. यात कार चालक विक्रमसिंग भैस हा कारमध्ये अडकला.
यानंतर घटनेची माहिती पारशिवणी पोलीस स्टेशनला देण्यात आली. लागलीच जयंत शेरेकर व एक पोलीस घटनास्थळी पोहचले. सोबतच सामाजिक कार्यकर्ते गौरव पणवेलकर, अमोल कनोजे हे पोलिसांना मदत करण्यासाठी घटनास्थळी पोहचले. त्यांनी जखमी विक्रमसिंग यांना कारबाहेर काढले. यानंतर दोघे पोलीस मौका पंचनामा करू लागले. यावेळी या ठिकाणी मोठ्या प्रमाणात ट्राफिक जाम झालेली होती . त्यामुळे पोलीस व गौरव पणवेलकर, अमोल कनोजे हे रस्त्यावरील ट्राफिक सुरळीत करू लागले होते.
यावेळी रस्त्यावर आणखी काही युवक होते. अशातच आमडी फाटाकडून एक कार एम. एच ४० के एच ६३९३ भरधाव वेगाने घटनास्थळाकडे ८.४५ वाजता आली. या कारने काही कळायच्या आत रस्त्यावर उभ्या असणाऱ्या लोकांना उडवले व घटनास्थावरून पळ काढला.
यावेळी कारने पोलीस जयंत शेरेकरसह इतरांना जोरात धडक दिली. लागलीच सर्वांना पारशिवणी येथील ग्रामीण रुग्णालयात आणण्यात आले. उपचारादरम्यान जयंत शेरेकर मृत पावला. यानंतर प्राथमिक उपचारानंतर जखमींना नागपूर येथील शासकीय रुग्णालयात हलविण्यात आले. अपघात घडविणारी कार पारशिवणी पोलिसांनी जप्त केली.परंतु कारमधील व्यक्ती फरार आहेत. पुढील तपास पारशिवणी पोलीस करीत आहे.
