मुंबई : १६ नोव्हेंबर -शिवसेना पक्षात फूट पडल्यापासून राज्यातील राजकीय समीकरणं बदलली आहेत. सध्या उद्धव ठाकरे गट, राष्ट्रवादी आणि काँग्रेस महाविकास आघाडीच्या रुपात एकत्र आहेत. तर दुसरीकडे शिंदे गट आणि भाजपा एकत्र येत युतीच्या रुपात सत्ताशकट हाकत आहेत. दुसरीकडे वंचित बहूजन आघाडीचे अध्यक्ष प्रकाश आंबेडकर यांनी काँग्रेस आणि ठाकरे गटाशी आघाडी करण्यास तयार असल्याची भूमिका घेतली आहे. याच कारणामुळे राज्यात आगामी काळात नवे सत्तासमीकर उदयास येणार का? असा प्रश्व विचारला जात आहे. असे असतानाच आता मुख्यमंत्री एकनाथ शिंदे प्रकाश आंबेडकर यांची भेट घेणार असल्याचे म्हटले जात आहे.
डॉ. बाबासाहेब आंबेडकर यांचे निवासस्थान असलेल्या राजगृह येथे या द्वयींची भेट होणार असल्याचे वृत्त आहे. सध्या राजगृहात प्रकाश आंबेडकर राहतात. आगामी काही दिवसांमध्ये उद्धव ठाकरे आणि प्रकाश आंबेडकर यांच्यात भेट होणार आहे, असे म्हटले जात होते. मात्र त्याआधीच एकनाथ शिंदे आज (१६ नोव्हेंबर) प्रकाश आंबेडकर यांची भेट घेणार आहेत. या भेटीमागचे नेमके कारण अद्याप समजू शकलेले नाही. मात्र आगामी मुंबई महापालिका निवडणूक तसेच आगामी विधानसभा निवडणूक या विषयांवर या द्वयींमध्ये चर्चा होण्याची शक्यता व्यक्त केली जात आहे.
आगामी काळात घोषित महाालिका निवडणुका तसेच २०२४ साली होणाऱ्या विधानसभा निवडणुकीच्या पार्श्वभूमीवर प्रकाश आंबेडकर यांनी उद्धव ठाकरे गट आणि काँग्रेसशी युती करण्यास तयार असल्याची भूमिका स्पष्ट केलेली आहे. आम्हाला उद्धव ठाकरे यांचे हिंदूत्व मान्य असल्याचेही प्रकाश आंबेडकर यापूर्वी म्हणाले आहेत. प्रकाश आंबेडकरांच्या या भूमिकेनंतर उद्धव ठाकरे गाटातील काही नेत्यांनीदेखील सकारात्मक प्रतिक्रिया नोंदवली होती. शिवशक्ती-भिमशक्ती एकत्र आले तर महाराष्ट्रासाठी ही चांगली बाब ठरेल अशी प्रतिक्रिया उद्धव ठाकरे गटातील नेते संजय राऊत यांनी दिली होती.
दरम्यान, प्रकाश आंबेडकर आणि उद्धव ठाकरे यांच्यात युतीसंदर्भात चर्चा करण्यासाठी अद्याप अधिकृतपणे भेट झालेली नाही. मात्र त्याआधीच एकनाथ शिंदे हे प्रकाश आंबेडकरांच्या भेटीला जाणार असल्याची शक्यता व्यक्त केली जात असल्यामुळे आगामी काळात कोणते राजकीय समीकरण उदयास येणार, याकडे सर्वांचेच लक्ष लागले आहे.
