मुंबई : ९ नोव्हेंबर – ठाकरे गटाच्या नेत्या आणि अभिनेत्री दिपाली सय्यद यांनी आज उद्धव ठाकरे गटाला मोठा धक्का दिला आहे. दिपाली सय्यद यांनी शिंदे गटात प्रवेश करणार असल्याची घोषणा केली आहे. स्वतः दिपाली सय्यद यांनी आज आपल्या प्रवेशाची माहिती दिली आहे. दिपाली सय्यद यादेखील ठाकरे गटाची साथ सोडणार असल्याने हा पक्षासाठी मोठा धक्का असल्याचं बोललं जात आहे.
शिवसेनेत बंड झाल्यानंतर उद्धव ठाकरे आणि मुख्यमंत्री एकनाथ शिंदे यांच्यात एकी घडवून आणणार असल्याचं वक्तव्य अभिनेत्री दीपाली सय्यद यांनी केलं होतं. मात्र, बंडानंतर उद्धव ठाकरे यांनी रिपब्लिकन चळवळीतील महत्त्वाच्या नेत्या सुषमा अंधारेंना पक्षात आणलं होतं. तेव्हापासून दीपाली सय्यद या नाराज असल्याचं बोललं जात होतं. त्यामुळं गेल्या अनेक दिवसांपासून दिपाली सय्यद या शिंदे गटाच्या वाटेवर असल्याच्या चर्चा होत्या. आज अखेर दिपाली सय्यद यांनी याबाबत घोषणा केली आहे.
दिपाली सय्यद या आज मुख्यमंत्री एकनाथ शिंदे यांच्या भेटीसाठी आल्या होत्या. मात्र, काही कारणास्तव त्यांची मुख्यमंत्र्यांसोबत भेट झालीच नाही. त्यानंतर प्रसारमाध्यमांना दिलेल्या मुलाखतीत त्यांनी अखेर शिंदे गटात जाणार असल्याची घोषणा केली. एकनाथ शिंदे यांनी मला शिवसेनेत आणलं होतं. त्यामुळं या कठीण प्रसंगात त्यांच्यासोबत उभं राहणं हे माझं कर्तव्य आहे, असं दिपाली सय्यद यांनी म्हटलं आहे. शनिवारपर्यंत म्हणजेच १२ नोव्हेंबरपर्यंत माझा शिंदे गटात प्रवेश होणार, असंही दिपाली सय्यद यांनी जाहीर केलं आहे.
