चंद्रपूर : १७ ऑक्टोबर – नागपुरातील दीक्षाभूमीवर बौद्धबांधवांना धम्मदीक्षा दिल्यानंतर तिसऱ्या दिवशी; १६ ऑक्टोबर १९५६ला चंद्रपुरात अनुप्रवर्तन झाले. बाबासाहेबांच्या उपस्थितीत हजारोंनी बौद्धधम्म स्वीकारला. या क्रांतिकारी क्षणाची आठवण म्हणून दोन दिवसीय धम्मचक्र अनुप्रवर्तन दिन सोहळा आयोजित करण्यात आला. हजारोंच्या संख्येत बौद्धबांधव दीक्षाभूमीवर जमले. बाबासाहेबांना अभिवादन करीत ‘जय भीम’चा घोष केला.
धम्मचक्र अनुप्रवर्तन सोहळ्यानिमित्त डॉ. बाबासाहेब आंबेडकर मेमोरिअल सोसायटीच्यावतीने डॉ. बाबासाहेब आंबेडकर महाविद्यालय परिसरातील दीक्षाभूमीवर विविध कार्यक्रमांचे आयोजन करण्यात आले. शनिवारी सकाळपासूनच गर्दी वाढू लागली. भन्ते, बौद्ध व आंबेडकरी विचारवंत, समीक्षक, साहित्यिक, देश-परदेशातील अभ्यासकांसोबत ग्रामीण भागातून बौद्धबांधव येऊ लागले. सायंकाळपर्यंत संपूर्ण दीक्षाभूमीचा परिसर गर्दीने फुलला. रविवारी; दुसऱ्या दिवशी डॉ. बाबासाहेब आंबेडकर यांच्या पुतळ्याला अभिवादन करून अस्थिकलशासह भिक्खू संघ व समता सैनिक दलाचे शौर्यशील पथसंचलन झाले. संस्थेचे अध्यक्ष अरुण घोटेकर यांच्या नेतृत्वात मिरवणूक निघाली. जटपुरा गेटने मार्गक्रमण करीत प्रियदर्शनी इंदिरा गांधी चौक, वरोरा नाका मार्गे दीक्षाभूमीवर पोहोचली. या मिरवणुकीत समता सैनिक दलाचे पाचशेवर सैनिक होते. मिरवणूक दीक्षाभूमीवर आल्यानंतर भदन्त आर्य नागार्जून सुरेई ससाई यांच्या हस्ते बुद्धविहारात बाबासाहेबांचा अस्थिकलश जनतेच्या दर्शनासाठी ठेवण्यात आला. यानंतर समता सैनिक दलाच्या विद्यार्थ्यांनी भदन्त आर्य नागार्जून सुरेई ससाई यांना मानवंदना दिली. डॉ. बाबासाहेब आंबेडकर यांच्या चळवळीप्रती कटिबद्ध राहण्याची शपथही देण्यात आली.
