मुंबई : १३ ऑक्टोबर – भाजपचे ज्येष्ठ नेते किरीट सोमय्या यांचा मुलगा नील सोमय्या एका वादात सापडले आहेत मुंबई विद्यापीठाने नील सोमय्या यांना अवघ्या १४ महिन्यांत पीएचडीची पदवी बहाल केल्याची चांगलीच चर्चा रंगली आहे. नील सोमय्या यांना पीएचडीची पदवी प्रदान करतानाच्या पद्धतीत काही अयोग्य नाही. मात्र, या सगळ्यात मुंबई विद्यापीठाने दाखवलेली तत्परता आणि वेग अनेकांच्या कुतूहलाचा विषय झाला आहे. नील सोमय्या यांनी ऑगस्ट महिन्यात पीचडीसाठी आपला प्रबंध सादर केला होता. त्यानंतर नील सोमय्या यांना अवघ्या दीड महिन्यात तोंडी परीक्षेसाठी बोलवण्यात आले. ही तोंडी परीक्षा झाल्यानंतर दुसऱ्याच दिवशी मुंबई विद्यापीठाने नील सोमय्या यांना पीएचडी पदवी प्रदान केली. या सगळ्या प्रकाराची सोशल मीडियावर चांगलीच चर्चा रंगली आहे. नील सोमय्या यांना इतक्या ‘एक्स्प्रेस’ वेगाने पीएचडी पदवी कशी देण्यात आली, असा सवाल नेटकऱ्यांकडून उपस्थित केला जात आहे.
नील सोमय्या यांच्या पीएचडी पदवीची नोंदणीची तारीख जून २०२१ आहे. तर त्यांना पीएचडी पदवी प्रदान करण्याची तारीख १ ऑक्टोबर २०२२ आहे. त्यांनी २०१७ मध्ये डॉक्टरेटच्या अभ्यासक्रमासाठी सिडनहॅम महाविद्यालयातून नोंदणी केली होती. त्यानंतर नील सोमय्या यांच्या अभ्यासाचा वेग थक्क करणारा होता. मुंबई महानगरपालिकेत नगरसेवक असलेल्या नील सोमय्या यांनी अवघ्या दीड वर्षांमध्ये पीएचडी पदवी कशी मिळवली, असा सवाल अनेकजण उपस्थित करत आहेत. एम.ए. खान हे नील सोमय्या यांचे पीएचडीचे मार्गदर्शक होते. २०२१ मध्ये सोमय्या यांच्या पीएचडीच्या विषयात काही सुधारणा सुचवण्यात आल्या. त्यानंतर वर्षभरात नील सोमय्या यांनी पीएचडीचा आपला प्रबंध सादर केला. मात्र, मुंबई विद्यापीठाने नील सोमय्या यांनी पीएचडी पदवीच्या अभ्याक्रमासाठी २०१७ मध्ये नोंदणी केल्याची बाब मुंबई विद्यापीठाने का नमूद केली नाही, याविषयी एम.ए. खान यांनी आश्चर्य व्यक्त केले आहे.
नील सोमय्या यांना पीएचडी पदवी देताना सर्व प्रक्रियांचे पालन करण्यात आले आहे. फक्त मुंबई विद्यापीठाने कोणताही विलंब न लावता सर्व गोष्टी पार पाडल्या. एरवी मुंबई विद्यापीठ कोणत्याही पीएचडीच्या विद्यार्थ्याच्या प्रबंधाबाबत इतकी तत्परता दाखवत नाही, असे एम.ए. खान यांनी म्हटले. नील सोमय्या यांचा पीएचडीचा प्रबंध मार्च २०२० मध्ये सबमिट करण्यात आला होता. त्यानंतर कोरोनाची साथ असल्यामुळे पुढे फारकाही घडले नव्हते. त्यानंतर हा प्रबंध मंजूर करण्यावेळी संशोधन आणि मान्यता समितीने पीएचडीच्या विषयांमध्ये काही सुधारणा सुचवल्या होत्या, अशी माहिती एम.ए. खान यांनी दिली.
नील सोमय्या यांनी जून २०२१ मध्ये पीएचडीसाठी नोंदणी केली होती. त्यानंतर १७८ ऑगस्ट २०२२ रोजी त्यांनी प्रबंध सादर केला. हा कालावधी १४ महिने इतका आहे. नियमानुसार पीएडीसाठी नोंदणी केल्यानंतर १२ महिन्यांनी संबंधित विद्यार्थ्याला आपला प्रबंध सादर करता येतो. त्यामुळे नील सोमय्या यांना योग्य पद्धतीने पीएचडीची पदवी देण्यात आली आहे, अशी माहिती मुंबई विद्यापीठाच्या प्रवक्त्यांनी दिली.
