मुंबई : १२ ऑक्टोबर – अंधेरी पूर्व निवडणुकीतील शिवसेना उद्धव बाळासाहेब ठाकरे पक्षाच्या उमेदवार ऋतुजा लटके बुधवारी मुंबई महापालिका आयुक्त इकबालसिंह चहल यांच्या भेटीसाठी आल्या होत्या. यावेळी आपण मुख्यमंत्री एकनाथ शिंदे यांना भेटलात का, असा प्रश्न पत्रकारांनी विचारला असता, ऋतुजा लटके यांनी नकारार्थी उत्तर देत, आपण मशाल चिन्हावर निवडणूक लढवणार असल्याचे स्पष्ट केले आहे.
मुंबई महापालिका सेवेचा राजीनामा देण्यासाठी आवश्यक प्रक्रिया लटकेंनी केली आहे. राजीनामा मंजूर करण्याची मागणी त्या पालिका आयुक्त इकबालसिंह चहल यांच्याकडे करणार आहेत.
तुमच्यावर दबाव असल्याची चर्चा आहे, असा प्रश्न पत्रकारांनी ऋतुजा लटके यांना विचारला असता, माझ्याकडे बघितल्यावर तुम्हाला वाटतंय का माझ्यावर दबाव आहे म्हणून? असं प्रतिप्रश्न त्यांनी केला. मुख्यमंत्री एकनाथ शिंदेंना आपण भेटल्याचं बोललं जात आहे, या प्रश्नावरही त्यांनी नकारात्मक प्रतिक्रिया दिली.
आमची निष्ठा उद्धव साहेबांसोबत आहे. माझे पती रमेश लटकेंची निष्ठा उद्धव साहेब आणि बाळासाहेबांसोबत होती. आता मी कमिश्नर साहेबांना भेटणार आहे. राजीनाम्याबाबत विनंती करणार की आजच्या आज मंजूर करावा. सोमवारी नोटीस पे – चलन जीएडीकडून दिलं, मी पेमेंट केलं. सोमवारपासून तिसरा दिवस आहे मी जीएडी कार्यालयात येऊन बसतेय. एओंनी सांगितलं की सगळं रेडी आहे, फक्त सहीमुळे तुमचा राजीनामा मंजूर करायचा राहिला आहे. मी निवडणूक लढणार ती मशाल या चिन्हावरच, असं ऋतुजा लटके यांनी स्पष्ट केलं.
दरम्यान, भाजपचे संभाव्य उमेदवार मुरजी पटेल माघार घेण्याची शक्यता आहे. तर मुख्यमंत्री एकनाथ शिंदे यांच्या नेतृत्वातील ‘बाळासाहेबांची शिवसेना’ अंधेरीच्या मैदानात उतरणार असल्याची चर्चा आहे. त्यामुळे आगामी मुंबई महापालिका निवडणुकीच्या आधीही शहरात शिंदे विरुद्ध ठाकरे असा थेट संघर्ष पाहायला मिळण्याची चिन्हं आहेत.
एकनाथ शिंदे यांच्या नेतृत्वातील ‘बाळासाहेबांची शिवसेना’ पक्षाला अखेर ढाल तलवार हे निवडणूक चिन्ह मिळालं आहे. त्यामुळे शिंदे गटाचा कॉन्फिडन्स वाढला आहे. त्यामुळे भाजपला जागा सोडण्याऐवजी शिंदे गटच हक्काच्या मतदारसंघात उमेदवार देण्याची शक्यता वर्तवली जात आहे. भाजप आणि बाळासाहेबांची शिवसेना युतीमध्ये ही निवडणूक लढवतील, असं विश्वसनीय सूत्रांचं म्हणणं आहे. एकनाथ शिंदे यांच्याकडून कोणाला उमेदवारी दिली जाणार, हे अद्याप गुलदस्त्यात आहे.
