अकोला : ११ ऑक्टोबर – पदवीधर मतदारसंघाच्या ऐन निवडणुकीच्या तोंडावर अकोला जिल्ह्यात भाजपमध्ये गटबाजी उफाळून आली आहे. त्यामुळे अकोल्यात राजकारण तापू लागले आहे. भाजपच्या कुठल्याही वरिष्ठ मंत्र्यांचं आगमन असो अथवा भाजप आयोजित कार्यक्रमाच्या पार्श्वभूमीवर पक्षाचे बॅनर लावण्यात येते. पण या बॅनरवर आमदार रणजीत पाटील यांना कुठेच स्थान दिले जात नसल्याचा आरोप आहे. विशेष म्हणजे रणजीत पाटील यांच्या समर्थकांकडून सोशल मीडियावर पक्षातच पक्षपातीपणा का? असा सवाल उपस्थित केला जातोय. आणि त्या पोस्ट अनेकांकडून ट्रोल केल्या जात आहे.
उपमुख्यमंत्री, गृहमंत्री तथा भाजप नेते देवेंद्र फडणवीस हे अकोल्याच्या पालकमंत्री पदाचा पदभार स्वीकारल्यानंतर प्रथमच ७ ऑक्टोबरला अकोला जिल्ह्याच्या दौऱ्यावर आले होते. यादरम्यान भाजपकडून ठिकठिकाणी रस्त्यावर त्यांच्या स्वागतासाठी बॅनर लावण्यात आले होते. परंतु या बॅनरवर माजी गृहराज्यमंत्री तथा अकोल्याचे माजी पालकमंत्री तसेच विद्यमान आमदार डॉ. रणजीत पाटील यांना स्थान देण्यात आले नाही. त्यामुळे रणजीत पाटील यांच्या समर्थकांकडून सोशल मीडियावर अनेक सवाल उपस्थित केल्या जात आहेत. पक्षातच पक्षपातीपणा का? आज ‘दादा’चा (डॉ. रणजीत पाटील) भाजपच्या बॅनरवर फोटो नव्हता. मनाला फार दुःख झालं. ज्या माणसाने (रणजीत पाटील) पोलीस वसाहत आणि दवाखाना (सुपर मल्टीस्पेशालिटी) अकोल्यात आणले. पाहिजे तेवढा विकास कामासाठी निधी आणला. आज त्यांनाच भाजपवाल्यांनी डावलले. आता ऐन पदवीधर मतदारसंघाच्या निवडणुकीच्या तोंडावर हा भाजपातील अंतर्गत मतभेद समोर येवू लागले आहे. तरीही निवडणुकीत दादाच निवडून येणार, असेही पाटील यांच्या समर्थकांनी ठणकावून सांगितले आहे. यासोबतच उपमुख्यमंत्री तथा अकोल्याचे पालकमंत्री देवेंद्र फडणवीस यांच्यासोबत दादांचे (रणजीत पाटील) अमरावतीकडे प्रस्थान करीत असल्याचे फोटो शेअर करून गटबाजी करणाऱ्या अकोल्यातीलच भाजपच्या पक्षातील प्रमुख आणि अन्य पदाधिकाऱ्यांना सूचक इशारा दिला आहे.
राष्ट्रवादीचे नेते तथा माजी आमदार बळीराम सिरस्कार यांच्या भाजप पक्षप्रवेश सोहळ्यासाठी भाजपचे प्रदेशाध्यक्ष चंद्रशेखर बावनकुळे अकोल्यात दाखल झाले होते. प्रवेश सोहळ्याचे आणि स्वागतासाठी शहरात ठिकठिकाणी फलक झळकले खरे, परंतु या फलकावरून रणजीत पाटील यांचा फोटो डावलण्यात आला होता. प्रवेश सोहळ्याच्या कर्मक्रमावरील मंचावर असलेल्या फलकावरही त्यांना डावलले होतं. या फलकात आमदार रणधीर सावरकर, आमदार संजय कुटे, आमदार आकाश पुंडकर, आमदार गोवर्धन शर्मा, आमदार हरीश पिंपळे, आमदार वंसत खंडेलवाल, आमदार प्रकाश भारसाखळे यांच्यासह अकोल्या महानगरध्यक्ष विजय अग्रवाल, माजी महानगरध्यक्ष किशोर मांगटे पाटील, माजी माझे जिल्हाध्यक्ष तेजराव थोरात, माजी महापौर अर्चना म्हैसने यांना स्थान मिळालं. मात्र आमदार असलेले रणजीत पाटील यांना मिळालं नसल्याने भाजपमध्ये गटबाजी असल्याचे दिसून आली होती.
अकोला जिल्हा भाजप हा विद्यमान खासदार संजय धोत्रे आणि माजी पालकमंत्री डॉ. रणजीत पाटील यांच्या गटात दुभंगली आहेय. दरम्यान, अकोला भाजपमधील मतभेताचा पेटलेला हा संघर्ष पुढील काळात विकोपाला जाण्याची चिन्ह आहेत.
डॉ. रणजीत पाटील यांच्याकडून पदवीधर मतदारसंघाची नोंदणी सुरू आहे. नोंदणी स्थळावर लावण्यात आलेल्या बॅनरवरही वरीष्ठ आमदारांसह भाजप नेत्यांना डावलण्यात आला आहे, असा आरोप भाजपमधील दुसऱ्या गटाने केला आहे.
