कानपूर, लोक त्यांचे पैसे सुरक्षित राहावेत यासाठी ते बँकेत ठेवतात. पण, बँका स्वत:कडे ठेवलेल्या नोटा किती जबाबदारीने ठेवतात, याचंच एक उदाहरण उत्तर प्रदेशातील कानपूरमध्ये पाहायला मिळालं. शहरातील पांडू नगर येथील पंजाब नॅशनल बँकेच्या शाखेत ठेवलेल्या करन्सी चेस्टमध्ये ४२ लाख रुपयांच्या नोटा पाण्यात भिजल्या आहेत.३ महिन्यांपूर्वी या नोटा बँकेत एका बॉक्समध्ये ठेवण्यात आल्या होत्या. यादरम्यान, या बॉक्समध्ये पाणी गेले. बँक कर्मचार्‍यांनी बॉक्समधील वरवरच्या नोटा पाहिल्या, परंतु त्यांनी खालच्या नोटा पाहिल्याच नाहीत. त्यांना असं वाटलं की पाणी सुकलं असेल.
बँकेच्या तिजोरीत जागा शिल्लक नव्हती. म्हणून रोकड वाढली असता या नोटा बॉक्समध्ये भरुन भिंतींजवळ ठेवल्या होत्या, अशी माहिती सूत्रांनी दिली. पावसात तळघराची भिंत ओलसर झाल्याने डब्यात पाणी शिरले. बराच वेळ पेटी तपासली गेली नाही, त्यामुळे तब्बल ४२ लाखांच्या नोटा पूर्णपणे भिजल्या.
दरम्यान, रिझर्व्ह बँक ऑफ इंडियाचे (आरबीआय) पथक पाहणीसाठी आले आणि हे संपूर्ण प्रकरण उघडकीस आलं. त्यानंतर हे प्रकरण वरील अधिकाऱ्यांकडे पाठवण्यात आले. त्यासाठी पुन्हा दुसरी टीम आली. या तपासानंतर पीएनबीच्या दक्षता पथकानेही तपास सुरु केला. नोटांची दखल का घेतली गेली जात नाही, असा प्रश्न उपस्थित करण्यात आला.
या दोन्ही अहवालानंतर पीएनबीच्या उच्च अधिकाऱ्यांनी पांडू नगर शाखेच्या चार अधिकाऱ्यांना निलंबित केले. ज्यामध्ये वरिष्ठ व्यवस्थापक देवीशंकर, व्यवस्थापक आसाराम, चेस्ट ऑफिसर राकेश कुमार आणि वरिष्ठ व्यवस्थापक भास्कर कुमार भार्गव यांचा सहभाग आहे. देवीशंकर यांनी २५ जुलै रोजीच पांडू नगर शाखेचं काम हाती घेतल्याचे सांगण्यात येत आहे. तर नोटा भिजण्याची घटना त्यांच्या येण्यापूर्वीच घडली होती, अशी माहिती आहे.