नागपूर : १० सप्टेंबर – सोनेगाव पोलिस स्टेशनअंतर्गत येणाऱ्या भेंडे ले-आऊट येथे दर्शनासाठी गेलेल्या ८० वर्षीय वृद्धेचा विजेच्या धक्क्याने मृत्यू झाला. ही घटना रात्री ९ वाजताच्या सुमारास घडली. कमलाबाई रेवडे, असे मृत वृद्धेचे नाव आहे.
भेंडे ले-आऊट येथे भेंडे ले-आऊट गणेशोत्सव मंडळाने गणेशमूर्तीची स्थापन केली. रात्री कमलाबाई या नातेवाइकांसह दर्शनाला गेल्या. दर्शन घेऊन त्या बाहेर आल्या. चप्पल घालताना त्यांचा तोल गेला. त्यांनी बाजूलाच असलेल्या लोखंडी रॉडला हात लावला. त्यांना विजेचा धक्का बसल्याने त्या खाली कोसळल्या. नातेवाइक व अन्य भाविकांनी कमलाबाई यांना उपचारासाठी हॉस्पिटलमध्ये दाखल केले असता डॉक्टरांनी तपासून कमलाबाई यांना मृत घोषित केले. याप्रकरणी सोनेगाव पोलिसांनी आकस्मिक मृत्यूची नोंद करून तपास सुरू केला आहे.