नागपूर : २९ जुलै – कर्ज फेडण्यासाठी नोकरानेच २० लाखांच्या लुटीचा बनाव करून काही रक्कम मोपेडच्या हेडलाइटमध्ये लपविल्याची माहिती समोर आली आहे. चिखली उड्डाणपुलावरील लुटीचा पर्दाफाश करूनगुन्हेशाखा पोलिसांनी या प्रकरणातील फिर्यादी सिद्धार्थ पुरुषोत्तम रामटेके (वय २७, रा. जुनी मंगळवारी) याला अटक केली.
सिद्धार्थ हा मिरची व्यापारी मोहन सहजवानी यांच्याकडे काम करतो. तो मालकाचा विश्वासू असल्याने आर्थिक व्यवहारही सांभाळतो. ‘क्राइम पेट्रोल’ मालिका बघून त्याने मालकाची रक्कम हडपण्याचा कट आखला. बुधवारी दुपारी मालकाने दिलेले २० लाख रुपये दिले. ही रक्कम जरीपटक्यातील वाहतूकदाराला देण्यास सांगितले. दरम्यान, त्याने चिखली उड्डाणपुलावर लुटारूंनी रोख लुटल्याची माहिती मालकाला दिली. त्यानंतर यशोधरानगर पोलिसांत तक्रार देण्यात आली. पोलिसांनी जबरी चोरीचा गुन्हा दाखल केला. गुन्हेशाखा पोलिसांनी हायटेक तपासाला सुरुवात केली. पोलिसांना सिद्धार्थवर संशय आला. पोलिसांनी त्याला ताब्यात घेऊन चौकशी केली. चौकशीदरम्यान त्याने लुटीचा बनाव केल्याचे मान्य केले. २० लाखांपैकी काही रक्कम रमणा मारोती परिसरातील दुकानात तर उर्वरित मोपेडच्या हेडलाइटमध्ये लपविल्याचे त्याने सांगितले. पोलिसांनी ही रक्कम जप्त करीत त्याला यशोधरानगर पोलिसांच्या स्वाधीन केले.
२०१८मध्ये सिद्धार्थने इलेक्ट्रिकचे दुकान थाटण्यासाठी साडेचार लाख रुपयांचे कर्ज घेतले होते. या व्यवसायत त्याला नुकसान झाले. कर्ज फेडण्यासाठी त्याने लुटीचा बनाव आखल्याचेही पोलिसांच्या तपासात समोर आले.
