मथुराः १८ जुलै – पंतप्रधान नरेंद्र मोदी आणि उत्तर प्रदेशचे मुख्यमंत्री आदित्य नाथ यांचे फोटो कचऱ्याच्या गाडीत घालून नेतानाचा व्हिडिओ सोशल मीडियावर व्हायरल झाला आहे. या व्हिडिओनंतर महापालिकेने कठोर कारवाई करत सफाई कर्मचाऱ्याला सेवेतून बडतर्फ केले आहे.
नुपूर शर्मा यांनी केलेल्या वादग्रस्त विधानानंतर युएईतील काही देशांना तीव्र आक्षेप घेतला होता. तिथल्या नागरिकांनीही भारताविरोधात कठोर भूमिका घेतली होती. तर, कचऱ्याच्या गाडीवर पंतप्रधान मोदींचा फोटो लावण्यात आला होता. असा व्हिडिओ सोशल मीडियावर व्हायरल झाला होता. या व्हिडिओवरुन भारतातही वातावरण तापलं होतं. देशाच्या पंतप्रधानांचा असा अपमान सहन केला जाणार नाही, अशी ताकीद भारतातील सर्वच राजकीय पक्षांनी अरब देशांना दिली होती. त्यानंतर पुन्हा एकदा कचऱ्याच्या गाडीत पंतप्रधान मोदींचा फोटो दिसून आला आहे. मात्र, ही घटना भारतातच घडल्याने एकच खळबळ माजली आहे.
सध्या सोशल मीडियावर मथुरेतील काही व्हिडिओ व्हायरल होत आहेत. या व्हिडिओत एक सफाई कर्मचारी गाडीतून कचरा नेत आहे. या गाडीत पंतप्रधान मोदी व योगी आदित्यनाथ यांचे फोटो आहेत. स्थानिकांनी हे फोटो पाहिल्यानंतर त्याला जाब विचारला मात्र त्याने हुज्जत घातली असल्याचं तिथल्या स्थानिक नागरिकांनी म्हटलं आहे.
शनिवारी सफाई कर्मचारी बॉबीपुत्र दुलीचंद हे कचरा वेचण्यासाठी आले होते. ते घेऊन जात असताना कचऱ्याच्या गाडीत पंतप्रधान नरेंद्र मोदी आणि योगी आदित्यनाथ यांचा फोटो दिसून आला. खरं तर कर्मचाऱ्याने हे फोटो बाजूला काढून ठेवणे अपेक्षित होतो. मात्र, त्याने कचऱ्याच्या गाडीतून ते फोटो नेले. त्यामुळं त्यावर तीव्र आक्षेप घेतला गेला. महापालिकेने तातडीने या सफाई कर्मचाऱ्यावर कारवाई करत त्याला सेवेतून बडतर्फ केलं आहे.
मथुरेतील सुभाषनगर महाविद्यालयाजवळ ही घटना घडली आहे. प्रशासकीय अधिकाऱ्यांना ही घटना समजल्यानंतर त्यांनी सफाई कर्मचाऱ्यास सेवेतून बडतर्फ केले आहे. कचरा गाड्यातील हे फोटो बाजूला काढण्यात आले असून अलवर येथील एका डॉक्टरने आपल्या कार्यालयात हे फोटो लावले आहेत.
