नवी दिल्ली : ३ जुलै – पंजाबचे माजी मुख्यमंत्री कॅप्टन अमरिंदरसिंग त्यांचा पक्ष पंजाब लोकतांत्रिक काँग्रेस भाजपमध्ये विलिन करणार असल्याचे सूत्रांनी सांगितले. अमरिंदरसिंग हे राष्ट्रीय लोकशाही आघाडीकडून उपराष्ट्रपतिपदाचे उमेदवार असल्याचे बोलले जात आहे.
अमरिंदरसिंग सध्या लंडनमध्ये असून, तेथे त्यांच्यावर शस्त्रक्रिया करण्यात आली आहे. ते भारतात परतताच पक्षाच्या विलिनीकरणाची घोषणा करणार असल्याचे समजते. पंजाब लोकतांत्रिक काँग्रेसने या संदर्भात काहीही सांगितलेले नाही. मात्र, भाजपचे पंजाबमधील नेते हरजितसिंग ग्रेवाल यांनी या संदर्भात निर्णय झाल्याची माहिती दिली. अमरिंदरसिंग हे लंडनहून परतताच विलिनीकरणाची घोषणा करणार असल्याचेही ते म्हणाले.
काँग्रेसचे ज्येष्ठ नेते असलेले अमरिंदरसिंग पंजाबचे गेल्या वेळचे मुख्यमंत्री होते. मात्र, पक्षांतर्गत गटबाजीमुळे त्यांचे पद त्यांना गमवावे लागले. त्यानंतर त्यांनी काँग्रेसला रामराम करून पंजाब लोकतांत्रिक काँग्रेसची स्थापना केली. या पक्षाच्या नावावर त्यांनी पंजाब विधानसभेची निवडणूकही लढविली, मात्र ते स्वत:ही यात पराभूत झाले.
दरम्यान, अमरिंदरसिंग हे राष्ट्रीय लोकशाही आघाडीचे उपराष्ट्रपतिपदाचे उमेदवार असल्याचे बोलले जात आहे. त्यासाठी अमरिंदर हे भाजपमध्ये प्रवेश करणार असल्याचे सांगितले जाते. भाजपमधील सूत्रांनी ही माहिती दिली. अमरिंदरसिंग यांच्या उमेदवारीची घोषणा झाल्यास पक्ष विलीनीकरणाची प्रक्रिया त्यांची पत्नी प्रणित कौर पुढे नेतील. प्रणित या काँग्रेसच्या खासदार आहेत.
उपराष्ट्रपतिपदाची निवडणूक येत्या ६ ऑगस्टला होणार आहे. त्यासाठी मुख्तार अब्बास नक्वी, अरिफ मोहम्मद खान आदींची नावे चर्चेत आहेत.
