नवी दिल्ली : २७ मे – लडाखमध्ये मोठी दुर्घटना घडली आहे. लष्कराच्या जवानांना घेऊन जाणारी बस नदीत कोसळली आहे. या दुर्घटनेत ७ जवानांचा मृत्यू झाला आहे. तर अनेक जण जखमी झाले आहेत. दुर्घटनेनंतर तातडीनं मदतकार्य सुरू करण्यात आलं. जखमी जवानांना रुग्णालयात दाखल करण्यात आलं. त्यांच्यावर उपचार सुरू आहेत.
थोइसपासून २५ किलोमीटर अंतरावर लष्करी जवानांच्या बसला अपघात झाला. जवानांची बस श्योक नदीत कोसळली. बसमध्ये २६ जवान होते. बस ५० ते ६० फूट खोल कोसळल्यानं जवळपास सगळेच जवान जखमी झाले. त्यांना उपचारांसाठी परतापूर येथील ४०३ फील्ड रुग्णालयात दाखल करण्यात आलं. सर्जिकल टीमला लेहहून परतापूरला पाठवण्यात आलं.
गंभीर जखमी झालेल्या जवानांच्या मदतीसाठी हवाई दलाशी संपर्क करण्यात आला आहे. त्यांना उपचारांसाठी वेस्टर्न कमांडला पाठवलं जाऊ शकतं. बसला अपघात कशामुळे झाला, यामागचं कारण अद्याप स्पष्ट होऊ शकलेलं नाही. लष्करानं अद्याप तरी अपघाताबद्दलची अधिकृत माहिती दिलेली नाही. ट्रांझिस्ट कॅम्पहून सब सेक्टर हनिफला जात असताना बसला अपघात झाला.
