नागपूर : २५ मे – कामठी रेल्वेस्थानकाजवळ रेल्वे इंजिनला वीजपुरवठा करणारी तार तुटल्याने गीतांजली व इंटरसिटी एक्स्प्रेस थांबवण्यात आली.
दक्षिण पूर्व मध्य रेल्वेंतर्गत कामठी रेल्वेस्थानकाजवळील आजनी रेल्वे फाटक मार्गावर मंगळवारी सकाळी तार तुटली. रेल्वे लाइनच्यावर असलेल्या तारेतून इंजिनवरील पेंटोच्या घर्षणाने वीजपुरवठा होतो. ही तार तुटल्याने खळबळ उडाली. अधिकारी व कर्मचाऱ्यांनी लगेच घटनास्थळी धाव घेत काम सुरू केले. रेल्वे फाटक बराच वेळ बंद राहिल्याने रस्त्यावरील वाहतूकही विस्कळीत झाली होती. नागपूर-जबलपूर महामार्गावर जड वाहनाच्या रांगा लागल्या. या मार्गावर शिवनाथ एक्स्प्रेस, टाटा इतवारी एक्स्प्रेस, महाराष्ट्र एक्स्प्रेस, इंटरसिटी, पॅसेंजर व विदर्भ एक्स्प्रेस धावतात. दरम्यान, सकाळची वेळ असल्याने इतर गाड्यांना याचा फटका बसला नाही. मात्र, इतवारी-बिलासपूर इंटरसिटी एक्स्प्रेस सोडण्यात आली नाही, तर मुंबईकडे जाणारी गीतांजली एक्स्प्रेस कन्हानजवळ थांबवण्यात आली. अधिकारी व कर्मचाऱ्यांनी तातडीने काम सुरू केल्याने सुमारे तीन तासांत वाहतूक सुरळीत झाली. थांबलेल्या गाड्या सोडल्यानंतर प्रवाशांनी सुटकेचा नि:श्वास घेतला.
