मुंबई : १३ मे – १०० कोटी रुपयांच्या वसुली प्रकरणात तुरुंगात असलेले राज्याचे माजी गृहमंत्री आणि राष्ट्रवादी काँग्रेसचे नेते अनिल देशमुख यांना विशेष पीएमएलए न्यायालयाने झटका दिला आहे. अनिल देशमुख यांनी खासगी रुग्णालयात वैद्यकीय उपचाराची परवानगी मागितली होती. मात्र, पीएमएलए न्यायालयाने ही विनंती फेटाळून लावली आहे. खासगी रुग्णालयाऐवजी जे.जे. रुग्णालयात खांद्यावरील शस्त्रक्रिया करण्याचे निर्देश न्यायालयाने दिले आहेत.
ईडीने अनिल देशमुख यांच्यावर खासगी रुग्णालयात उपचार करण्यास विरोध दर्शविला होता. देशमुख यांची वैद्यकीय तपासणी केल्यानंतर त्यांच्या निखळलेल्या खांद्यावर तातडीने शस्त्रक्रिया करण्याची आवश्यकता नाही. जेजे रुग्णालयात अशी शस्त्रक्रिया करण्याची व्यवस्था आणि तज्ज्ञ डॉक्टरही उपलब्ध आहेत, असा अहवाल ईडीने कोर्टात सादर केला होता. या अहवालाच्याआधारे ईडीने देशमुख यांच्या खासगी रुग्णालयातील उपचारांच्या विनंतीला तीव्र विरोध दर्शविला होता.या अहवालाची दखल घेत विशेष न्यायाधीश राहुल रोकडे यांनी विनंती फेटाळली.
नवाब मलिक यांनी वैद्यकीय कारणासाठी जामिनाची मागणी केली होती. मात्र, पीएमएलए न्यायालयाने नवाब मलिक यांना जामीन दिला नसला तरी त्यांना खासगी रुग्णालयात उपचार घेण्याची परवानगी दिली आहे. नवाब मलिक यांच्यावर कुर्ला येथील क्रिटी केअर रुग्णालयात उपचार होणार आहेत. उपचारांबरोबरच पोलिस बंदोबस्तासाठी येणारा खर्च मलिक कुटुंबाला उचलावा लागणार आहे. मलिक यांच्यासोबत एकाच कुटुंब सदस्याला राहण्याची मुभा न्यायालयाने दिली आहे.
