कोलकाता : २८ एप्रिल – पंतप्रधान नरेंद्र मोदी यांनी काल सर्व राज्यांच्या मुख्यमंत्र्यांसोबत करोना आढावा बैठक घेतली. केंद्र राज्य सहकार्य आणि समन्वयाबद्दल बोलताना नरेंद्र मोदी यांनी राज्यांना पेट्रोल आणि डिझेलवरील कर कपात करण्याचं आवाहन करुन देखील महाराष्ट्र, पश्चिम बंगाल, तामिळनाडू, छत्तीसगड आणि केरळ राज्यांनी कर कमी न केल्याचा उल्लेख केला होता. भाजपशासीत राज्यांनी तोटा सहन करुन जनतेला दिलासा दिला होता. मात्र, या राज्यांनी आता तरी देशहिताचा विचार करुन कर कमी करावेत, असं आवाहन मोदींनी केलं होतं. या प्रकरणावरुन आता राजकारण सुरु झालं आहे. पश्चिम बंगालच्या मुख्यमंत्री ममता बॅनर्जी यांनी नरेंद्र मोदींवर पलटवार केला आहे. आम्ही गेल्या ३ वर्षांपासून पेट्रोल आणि डिझेलच्या किमतीपासून जनतेला दिलासा मिळावा म्हणून १५०० कोटी रुपये खर्च केले आहेत. आमचे केंद्राकडे प्रलंबित असलेले ९७ हजार कोटी आम्हाला द्या पुढली पाच वर्ष पेट्रोल आणि डिझेलवर कर लावणार नाही, असं ममता बॅनर्जी म्हणाल्या.
पंतप्रधान नरेंद्र मोदी यांनी सांगितलेली माहिती चुकीची होती. आम्ही गेल्या तीन वर्षांपासून पेट्रोल आणि डिझेलवर अनुदान देत आहोत. त्यासाठी आम्ही १५०० कोटी खर्च केले आहेत, असं ममता बॅनर्जी म्हणाल्या. नरेंद्र मोदी राज्यांना कर कमी करायला लावत आहेत, मात्र आमचे केंद्रांकडे प्रलंबित असलेले ९७ हजार कोटी द्यावेत. त्यापैकी अर्धी रक्कम जरी दिली तरी आम्ही कर कमी करु, असं ममता बॅनर्जी म्हणाले. केंद्र सरकारनं आमचे प्रलंबित पैसे दिल्यास आम्ही पेट्रोल आणि डिझेलवरील कर कमी करु त्यासाठी ३ हजार कोटींचं अनुदान जाहीर करु, असं देखील त्या म्हणाल्या आहेत. आमचे पैसे केंद्राकडे प्रलंबित असताना सरकार कसं चालवणार असा सवाल देखील बॅनर्जींनी केला
तृणमूल काँग्रेस पक्षाच्यावतीनं केंद्र सरकारनं आमचे ९७ हजार ८०७.९१ कोटी रुपये द्यावेत, आम्ही पुढील पाच वर्ष पेट्रोल आणि डिझेलवरील सगळे कर रद्द करु असं म्हटलं आहे. नरेंद्र मोदीजी तुम्ही काय करु शकता हे आम्हाला पाहायचं आहे, असं देखील टीमएमसीच्यावतीनं सांगण्यात आलं आहे. करोना बैठक असल्यानं पंतप्रधान मोदींना त्यावेळी उत्तर देता आलं नाही, असं देखील ममता बॅनर्जी म्हणाल्या.
ममता बॅनर्जी यांनी मोदी सरकारनं २०१४ पासून १७ लाख ३१ हजार २४२ कोटी रुपयांची कमाई केल्याचा दावा केला आहे. तुम्ही राज्य सरकारांना कर कपात करण्यासाठी सांगता तेव्हा ही बाब लोकांना का सांगत नाही, असा सवाल देखील ममता बॅनर्जींनी केला आहे.
