मुंबई : १४ एप्रिल – मराठी अभिनेत्री हेमांगी कवी सोशल मीडियावर कमालीची सक्रिय असते. ती देशातील राजकीय आणि सामाजिक अशा बऱ्याच मुद्द्यांवर आपलं मत सोशल मीडियाच्या माध्यमातून व्यक्त करताना दिसते. अनेकदा तिच्या सोशल मीडिया पोस्ट व्हायरल होताना दिसतात. आताही काहीसं असंच घडलंय. नुकतीच भारतरत्न डॉ. बाबासाहेब आंबेडकर यांच्या जयंतीनिमित्त हेमांगीनं केलेली फेसबुक पोस्ट चर्चेत आली आहे.
आज देशभरात भारतरत्न डॉ. बाबासाहेब आंबेडकर यांची जयंती मोठ्या उत्साहात साजरी केली जात आहे. अशात हेमांगी कवीनं तिच्या फेसबुक पेजवर केलेली एक पोस्ट सोशल मीडियावर चर्चेचा विषय ठरताना दिसत आहेत. आंबेडकर जयंतीनिमित्त पोस्ट शेअर करताना हेमांगीनं लिहिलं, ‘मानवी हक्क आणि समाजहितासाठी संविधानात तुम्ही सांगितलेल्या गोष्टी अमलात आणायची आमचीच लायकी नाही! जमलं तर माफ करा बाबासाहेब! #जयभीम #jaybhim #डॉबाबासाहेबआंबेडकर
हेमांगी कवीची ही फेसबुक पोस्ट सध्या सोशल मीडियावर चर्चेत आहे. अनेकांनी तिच्या या पोस्टवर कमेंट करत आपली मतं मांडली आहेत. तसं पाहायला गेलं तर एखाद्या विषयावर परखड मत व्यक्त करण्याची हेमांगी कवीची ही पहिलीच वेळ नाही. या आधीही तिनं काही विषयांवर अतिशय परखड मत व्यक्त केलं होतं आणि त्यामुळे काही लोकांनी तिच्यावर टीका देखील केली होती.
हेमांगी कवीच्या कामाबद्दल बोलायचं तर ती लवकरच ‘भारत माझा देश आहे’ या मराठी चित्रपटातून प्रेक्षकांच्या भेटीला येणार आहे. सध्या या चित्रपटाची सोशल मीडियावर जोरदार चर्चा आहे. याशिवाय सध्या ती कर्लस मराठी वाहिनीवरील ‘लेक माझी दुर्गा’ या मालिकेत महत्त्वपूर्ण भूमिकेत दिसत आहे. तिनं या मालिकेत साकारलेली ‘दुर्गा’च्या आईची भूमिका देखील चांगलीच चर्चेत आहे.