नागपूर : २८ मार्च – महापालिका व ऑरेंजसिटी वॉटर यांच्यातर्फे पेंच-एक जलशुद्धीकरण केंद्राची दुरुस्ती करण्यात येणार आहे. त्यामुळे मंगळवार, २९ मार्च रोजी अर्ध्या शहराचा पाणीपुरवठा बंद राहील. यासाठी मंगळवारी सकाळी १० ते बुधवारी सकाळी १० वाजेपर्यंत शटडाउन घेण्यात येणार आहे. त्यामुळे नागरिकांनी पाणी जपून वापरावे आणि पाण्याचा अपव्यय टाळावा.
यामुळे शहरातील धंतोली, मंगळवारी, गांधीबाग, सतरंजीपुरा व धरमपेठ या पाच झोनचा पाणीपुरवठा २४ तासांसाठी बंद राहील. या काळात टँकरद्वारेही पाणीपुरवठा होणार नाही, असेही स्पष्ट करण्यात आले आहे. या शटडाउनदरम्यान राजभवन येथील ९०० मिलीमीटर व्यासाच्या जलवाहिनीवरील मोठी गळती दुरुस्त करण्यात येणार आहे. त्याचबरोबर राजभवन ते बोरियापुरा मुख्य जलवाहिनीवरील फ्लो मीटर लावण्यासाठी गोरेवाडा जलशुद्धीकरण केंद्राचे शटडाउन घेण्यात येणार आहे.
शटडाउनमुळे मंगळवारी झोनमधील राजभवन, सदर, राजनगर, गोधनी, गोरेवाडा, धंतोली झोनमधील रेशीमबाग, हनुमाननगर, वंजारीनगर नवे व जुने जलकुंभ, तर गांधीबाग झोनमधील सीताबर्डी फोर्ट जलकुंभ, सतरंजीपुऱ्यातील बस्तरवारी, बोरियापुरा मुख्य जलवाहिनी, वाहना ठिकाना जलकुंभ, बोरियापुरा जलकुंभ, धरमपेठ झोनमधील राजभवन-सीताबर्डी मुख्य जलवाहिनी आदी भागांतील पाणीपुरवठा बंद राहील.
