यवतमाळ : १ मार्च – १४ वर्षीय विद्यार्थिनीचं शाळेसमोरुन अपहरण करुन विकृत तरुणाने तिला दुचाकीवरुन निर्जनस्थळी नेऊन तिच्यावर पाशवी अत्याचार केला. हादरवून सोडणारी ही गंभीर घटना शनिवारी २६ फेब्रुवारीला दुपारी येथील नागपूर- धामणगाव बायपास मार्गावरील पाचधारा परिसर जंगलातील घडली. इमरान शेख (२२) रा. भोसा असं विद्यार्थिनीवर अत्याचार करणाऱ्या विकृत तरुणाचं नाव आहे.
पीडित विद्यार्थिनी ही भोसा परिसरातील एका शाळेत आठव्या वर्गात शिकते. शनिवारी सकाळी शाळा असल्याने ती नेहमीप्रमाणे घरुन शाळेत जाण्यासाठी घराबाहेर पडली. मात्र, शाळा सुटायची वेळ उलटून बराच अवधी झाला तरी पीडित मुलगी घरी परतली नाही. त्यामुळे आईने शोधाशोध सुरु केली. मात्र, मुलीचा थांगपत्ता लागला नाही. त्यानंतर दुपारी पीडित विद्यार्थिनी घरी परतली. तेव्हा तिच्या मावशीने तिला उशीर झाल्याबद्दल विचारणा केली. तेव्हा पीडित विद्यार्थिनींने अश्रूंना वाट मोकळी करून देत आपबिती कथन केली.
शाळा सुटल्यानंतर पीडितेला आरोपी इम्रान शेख याने वाटेत गाठले. तसेच बळजबरीने दुचाकीवर बसून पाचधारा परिसरातील जंगलात नेले. जंगलात नेऊन चिमुरडीवर पाशवी अत्याचार केले, अशी सगळी आपबिती मुलीने आपल्या कुटुंबीयांना सांगितली. हे ऐकून आई आणि मावशीचे अवसानच गळालं. कसंबसं स्वतःला सावरत त्यांनी अवधूत वाडी पोलीस ठाणं गाठलं. घडलेल्या घटनेप्रकरणी पीडितेच्या नातेवाईकांनी रीतसर तक्रार दिली. यावरुन आरोपी इम्रान शेख याच्याविरोधात भादवि ३६३, ३६६(अ), आणि बाल लैंगिक अत्याचार प्रतिबंधक कायद्याच्या चार कलमान्वये गुन्हा दाखल केला आहे.
अवधूतवाडी पोलिसात पीडितेच्या नातेवाईकांची तक्रार प्राप्त होतात क्षणाचाही विलंब न करता गुन्हा दाखल करण्यात आला. त्यानंतर पोलिसांनी तात्काळ भोसा परिसर गाठून इम्रान शेख याला बेड्या ठोकल्या. त्यानंतर त्याला जिल्हा सत्र न्यायालयापुढे पोलिसांनी हजर केले. न्यायालयाने त्याला एका दिवसाची कोठडी सुनावली आहे.
