नागपूर : २१ फेब्रुवारी – लग्नसमारंभांत वऱ्हाडी बनून दागिने चोरी करणाऱ्या महिला चोरांच्या टोळीला जुनी कामठी पोलिसांनी रंगेहाथ अटक केली. मालती सुरेंद्र लोंढे (वय ४०), सुवर्णा ऊर्फ अन्नू दादन पात्रे (वय २८), अरुणा संजय खंडारे (वय ५०) आणि मिताली रॉकी लोंढे (वय २६, सर्व रा. आनंदनगर, वर्धा) अशी अटकेतील महिलांची नावे आहेत.
कन्हानमधील सत्रापूर येथील रंगारी यांच्या कुटुंबातील तरुणीचे रविवारी जुनी कामठीतील संजीवनी सभागृह येथे रविवारी लग्न होते. या लग्नात चौघीही वऱ्हाडी बनून आल्या. रेषा रवी कापसे (वय ५०) यांनी जेवण केले. त्या पाणी घेण्यासाठी नळाजवळ गेल्या. येथे आधी मालती, सुवर्णा, मिताली व अरुणा उभ्या होत्या. मितालीने रेषा यांच्या गळ्यातील मंगळसूत्र ओढले. रेषा यांनी वेळीच ते मंगळसूत्र पकडले. अर्धे मंगळसूत्र त्यांच्या हाती लागले. रेषा यांनी मागे बघितले. जवळ उभ्या महिलांवर त्यांना संशय आला. रेषा यांनी आरडाओरड केली. चौघीही पळायला लागल्या. इतर वऱ्हाडी व सुरक्षारक्षकांनी सभागृहाबाहेर चौघींना पकडले. जुनी कामठी पोलिसांना माहिती दिली. माहिती मिळताच पोलिस तेथे पोहोचले. पोलिसांनी चौघींना अटक केली.