अमरावती : २३ जानेवारी – अमरावती लोकसभा मतदार संघाच्या खासदार नवनीत रवी राणा या नेहमीच या ना त्या कारणाने चर्चेत राहतात. पुतळ्याचा वाद शमत नाही तोच खासदार नवनीत राणा पुन्हा चर्चेत आल्या आहेत त्या एका ऑडिओ क्लिपमुळे. युवा स्वाभिमान पार्टीच्या कार्यकर्त्यांनी आपली फसवणूक केल्याची तक्रार एका पीडित महिलेने खासदार नवनीत राणा यांच्याकडे केली. पण त्यावर राणांनी उलट विचारणा केल्यामुळे वाद सुरू झाला होता. अखेर यावर आता महिला आयोगाकडून गंभीर दखल घेण्यात आली आहे.
पीडितेने नवनीत राणा यांना कॉल करून आपली परिस्थिती सांगितली व पार्टीच्या कार्यकर्त्यांना समज देण्याची ही विनंती केली. मात्र, यावर चिडत खासदार नवनीत राणा यांनी पीडितेची उलट तपासणी सुरू करत तुम्ही मला विचारुन लफडा केला का? असा उलट प्रश्न विचारणारी एक ऑडिओ क्लिप व्हायरल झाली आहे. या ऑडिओ क्लिपची राज्य महिला आयोगाने गंभीर दखल घेतली आहे. यासंदर्भात पोलिसांनी चौकशी करून अहवाल सादर करणे असे निर्देश राज्य महिला आयोगाच्या अध्यक्ष रुपाली चाकणकर यांनी दिली आहे.
याबाबत सविस्तर माहितीचे ट्विट करत राज्य महिला आयोगाच्या अध्यक्ष रुपाली चाकणकर म्हणाल्या की, अमरावती जिल्ह्यामध्ये पहिले लग्न झाले असताना देखील पहिल्या पत्नीला अंधारात ठेवत दुसरे लग्न केलेल्या आणि त्यानंतर पहिली पत्नी तसेच तिच्या १८ महिन्याच्या मुलीला वाऱ्यावर सोडून देणाऱ्या एका इसमाविरुद्ध राज्य महिला आयोगाकडे तक्रार दाखल झाली आहे.
या घटनेमध्ये पीडित महिलेने न्याय मिळावा म्हणून अमरावतीचा खासदार नवनीत राणा यांना फोन केला असता अर्वाच्च आणि अश्लील भाषेत तिचा अपमान केला. कारण या महिलेचा पती हा नवनीत राणा यांच्या जवळचा व पक्षाचा पदाधिकारी असल्याचे तक्रारीत नमूद केले आहे. या प्रकरणी अमरावती पोलिसांना तात्काळ कारवाई करून त्याचा अहवाल राज्य महिला आयोगास सादर करण्याचे निर्देश दिले असून खासदार नवनीत राणा यांनी याप्रकरणी योग्य तो खुलासा लेखी स्वरूपात द्यावा असे देखील निर्देश त्यांना राज्य महिला आयोगाच्या वतीने देण्यात येत आहेत.
