नागपूर : २१ जानेवारी – अनैतिक संबंधाची माहिती पतीला दिल्याच्या रागातून भाचीने प्रियकराच्या मदतीने आत्यासह दोघांची निर्घृण हत्या केली. रामटेकमध्ये घडलेल्या या थरारक हत्याकांडाचा स्थानिक गुन्हेशाखा पोलिसांनी अवघ्या ३६ तासांत पर्दाफाश करून मारेकरी भाची व तिच्या प्रियकराला अटक केली. त्यांच्या दोन अल्पवयीन साथीदारांनाही पोलिसांनी ताब्यात घेतले आहे.
संदीप मिश्रा (वय ६०), जयवंता भगत (४५, दोन्ही रा. मौली, ता. रामटेक) अशी मृतांची तर रितू बागबांदे (वय ३२, रा.बालाघाट) व महेश भय्यालाल नागपुरे (वय ४१, रा. सालेकसा) अशी अटकेतील मारेकऱ्यांची नावे आहेत.
पोलिसांनी दिलेल्या माहितीनुसार, संदीप हे जयवंता यांचे मानलेले भाऊ होते. गेल्या सहा वर्षांपासून दोघेही रामटेकमधील एका शेतात काम करायचे व तेथेच राहायचे. सुमारे दोन महिन्यांपूर्वी जयवंता यांची भाची रितू व तिचा प्रियकर महेश हे रामटेक येथे आले. दोघेही त्यांच्यासोबत राहून अन्य शेतात काम करायचे. जयवंता यांनी रितूच्या पतीला याबाबत सांगितले. त्यामुळे तिचा पती रामटेकमध्ये आला. त्याने रितूला फटकारले. सोबत घेऊन गेला. प्रेमप्रकरणाची माहिती पतीला दिल्याने रितू व महेश संतापले. दोन दिवसांपूर्वी रितू, महेश व त्यांचे दोन अल्पवयीन साथीदार कारने रामटेक येथे आले. त्यांनी संदीप व जयवंता या दोघांना बळजबरीने कारमध्ये बसविले. काही अंतरावर नेऊन महेशने कुऱ्हाडीने वार करून संदीप यांचा खून केला. रामटेकमधील जंगलात त्यांचा मृतदेह फेकला. त्यानंतर जयवंता यांचीही कुऱ्हाडीने वार करून हत्या केली. त्यांचाही मृतदेह भंडाऱ्याजवळील जंगलात फेकला व मारेकरी फरार झाले.
मंगळवारी सायंकाळी संदीप यांचा मृतदेह आढळून आला. याप्रकरणी रामटेक पोलिसांनी खुनासह विविध कलमान्वये गुन्हे दाखल केले. तपासादरम्यान संदीप यांच्यासोबत राहात असलेल्या जयवंता याही बेपत्ता असल्याचे पोलिसांना कळाले. पोलिस अधीक्षक विजयकुमार मगर यांनी रामटेक गाठत या हत्याकांडाचा छडा लावण्याचे निर्देश स्थानिक गुन्हेशाखा व रामटेक पोलिसांना दिले. मगर यांच्या मार्गदर्शनाखाली रामटेकचे ठाणेदार प्रमोद मकेश्वर, स्थानिक गुन्हेशाखेचे निरीक्षक ओमप्रकाश कोकाटे, साहाय्यक निरीक्षक राजीव कर्मलवार, जितेंद्र वैरागडे, विवेक सोनवणे, हेडकॉन्स्टेबल गजेंद्र चौधरी, विनोद काळे, नाना राऊत, प्रणय बनाफर, वीरेंद्र नरड, रूपाली कांबळे व त्यांच्या सहकाऱ्यांना मारेकऱ्यांचा शोध सुरू केला.
भंडाऱ्यात जयवंता यांचा मृतदेह आढळून आला. याबाबत स्थानिक गुन्हेशाखा पोलिसांना माहिती मिळाली. स्थानिक गुन्हेशाखा पोलिसांनी जयवंता यांच्या मुलीशी संपर्क साधला असता ओळख पटली. रितू ही प्रियकरासह रामटेकला आली होती, अशी माहिती स्थानिक गुन्हेशाखेला मिळाली. स्थानिक गुन्हेशाखा पोलिसांनी बालाघाट गाठले. रितू व दोन अल्पवयीन मारेकऱ्यांना अटक केली. तर अन्य एका पथकाने सालेकसा परिसरातून महेशला अटक केली. त्यांना रामटेक पोलिसांच्या स्वाधीन केले.
