नागपूर : २९ डिसेंबर – नागपूर शहरात दोन विविध ठिकाणी घडलेल्या घटनांमध्ये दोन तरुणांची हत्या करण्यात आली. यातील एकाची तर केवळ दुसऱ्याकडे बघितल्याने, ‘खुन्नस दे रहा क्या?’ असे म्हणत क्षुल्लक वादातून हत्या करण्यात आली. तर अन्य एका घटनेत एका तरुणाची हत्या करून मारूती ओम्नीमध्ये त्याचा मृतदेह टाकून आरोपी पसार झाल्याचे समोर आले आहे.
यातील पहिली घटना सदर पोलिस ठाण्याच्या हद्दीतील गड्डीगोदाम परिसरात सोमवारी मध्यरात्रीनंतर घडली. अनिकेत सुनील तांबे (वय २५, रा. मोहननगर, खलासी लाईन) असे मृत तरुणाचे नाव आहे. त्याच्या हत्येच्या आरोपाखाली पोलिसांनी जय अशोक सोमकुंवर (वय २८) आणि भूषण सुखदेव सोमकुवर (वय २६, रा. दोघेही रा. गड्डीगोदाम, गौतमनगर) या दोन भावांना अटक केली आहे. अनिकेत हा रात्रीच्या सुमारास गौतमनगर परिसरात कोल्ड ड्रिंक पिण्यासाठी गेला होता. यावेळी आरोपी तेथेच होते. अनिकेतचा आरोपींसोबत जुना वाद असल्याचे सांगितले जाते आहे. यावेळी आरोपी आणि अनिकेतची नजरानजर झाली. यातूनच त्यांच्यात वाद सुरू झाला आणि रागाच्या भरात आरोपींनी चाकुच्या सहाय्याने अनिकेतचा गळा कापला. अनिकेत रक्ताच्या थारोळ्यात पडला आणि जागीच मरण पावला. पोलिसांनी सोमकुंवर बंधुंना अटक केली आहे.
अन्य एका घटनेत हिंगणा पोलीस ठाण्याच्या हद्दीत एका तरुणाची हत्या करून त्याचा मृतदेह ओम्नी व्हॅनमध्ये टाकून दिल्याचे समोर आले आहे. ही घटना रात्री अकराच्या सुमारास उघडकीस आली. धीरज ज्ञानेश्वर माकोडे (वय २४, रा. गुमगांव) असे मृत तरुणाचे नाव आहे. गुमगाव येथे मारोती व्हॅन क्रमांक एमएच ३१-एफए ३९९५ क्रमांकाच्या गाडीत त्याचा मृतदेह पडला असल्याची माहिती पोलिसांना मिळाली होती. तिक्ष्ण शस्त्रांनी वार करून त्यांची हत्या करण्यात आली आहे. हत्येमागील कारण तसेच आरोपी अद्याप अज्ञात असून पोलिसांनी खुनाचा गुन्हा दाखल करून तपास सुरू केला आहे.
