नागपूर : २८ डिसेंबर – क्षुल्लक कौटुंबिक वादातून विवाहितेने तिच्या तीन वर्षांच्या मुलासमोरच गळफास घेऊन आत्महत्या केली. ही धक्कादायक आणि तितकीच दुर्दैवी घटना यशोधरानगर पोलिस ठाण्याच्या हद्दीतील संजय गांधीनगर परिसरात दुपारी १ वाजताच्या सुमारास घडली.
मेघा सूरज कांबळे (२८, रा. संजय गांधीनगर) असे मृत महिलेचे नाव आहे. मेघा आणि सूरज हे दोघेही एकाच वस्तीत राहत होते. त्यांची ओळख होती. ओळखीतून मैत्री आणि पुढे प्रेमात रूपांतर झाले. दोघांनी लग्न करण्याचा निर्णय घेतला. मात्र, कुटुंबीयांचा विरोध होता. शेवटी दोघांनी प्रेमविवाह केला. गेल्या सहा वर्षांपासून सुखी संसार सुरू होता. त्यांना तीन वर्षांचा मुलगा आहे. सूरज पेंटिंगची कामे करतो. पोलिसांनी दिलेल्या माहितीनुसार, त्याला दारूचे व्यसन होते. यावरून मेघा व सूरजमध्ये सातत्याने वाद होत. काही दिवसांपूर्वी परत एकदा त्यांचा वाद झाला. त्यामुळे मेघा माहेरी आली. गेल्या दोन दिवसांपासून ती तणावात होती. त्यामुळे तिची आई तिची समजूत घालत होती. सोमवारी दुपारी तिची आई काही कारणास्तव बाहेर गेली. तर मेघा व तिचा मुलगा घरातच होते. तिने घरात मुलासमोरच सिलिंग फॅनला ओढणीने गळफास घेतला. काही वेळात मुलाचा रडण्याचा आवाज आल्याने तिची आई घरात गेली. तिला मेघा गळफास घेतलेल्या अवस्थेत दिसली. आईने आरडाओरड केली. शेजारी धावले. मेघाला खासगी रुग्णालयात दाखल करण्यात आले. मात्र, डॉक्टरांनी तिला तपासून मृत घोषित केले.
