नवी दिल्ली : १२ नोव्हेंबर – काँग्रेसचे ज्येष्ठ नेते गुलाम नबी आझाद यांनी माजी केंद्रीय मंत्री सलमान खुर्शीद यांच्या नवीन पुस्तकातील हिंदुत्वाबाबत केलेल्या वक्तव्याबाबत खुलेआम असहमती दाखवली आहे. हिंदुत्वाची तुलना इसिस शी केली जाऊ शकते, हे चुकीचे आहे आणि अतिशयोक्ती असल्याचे, गुलाम नबी आझाद यांनी म्हटले. खुर्शीद यांच्या नवीन पुस्तकात हिंदुत्वाबद्दल जी मतं मांडली आहेत, त्याच्यावरून सध्या देशात वाद सुरू आहे.
खुर्शीद यांच्या पुस्तकाचा संदर्भ देत आझाद यांनी ट्विट केले की, “हिंदू धर्माच्या मिश्र संस्कृतीपासून वेगळे असलेली राजकीय विचारधारा म्हणून हिंदुत्वाशी आम्ही असहमत असलो, तरी इसिस आणि जिहादी इस्लामशी हिंदुत्वाची तुलना करणे हे वास्तवात चुकीचे आणि अतिशयोक्ती आहे.’
आझाद हे काँग्रेसच्या ‘जी 23’ गटाचे प्रमुख नेते आहेत. खुर्शीद यांनी अनेक प्रसंगी उघडपणे या गटावर टीका केली असून त्यांना गांधी घराण्याचे विश्वस्त मानले जाते.
याबाबत विचारले असता खुर्शीद यांनी सांगितले की, “हिंदू धर्म हा अत्यंत उच्च दर्जाचा धर्म आहे. यासाठी गांधीजींनी जी प्रेरणा दिली, त्याहून मोठी प्रेरणा दुसरी असूच शकत नाही. मी नवीन लेबल का स्वीकारू? कोणी हिंदू धर्माचा अपमान केला तरी मी बोलेन. मी म्हणालो, की जे हिंदुत्वाचे राजकारण करतात ते चुकीचे आहेत आणि इसिस देखील चुकीचे आहे.”
दरम्यान, राजधानी दिल्लीतील एका वकिलाने खुर्शीद यांच्याविरोधात दिल्ली पोलिसात तक्रार नोंदवली आहे. वकील विवेक गर्ग यांच्या म्हणण्यानुसार, खुर्शीद यांनी त्यांच्या “सनराईज ओव्हर अयोध्या: नेशनहूड इन अवर टाइम्स” या पुस्तकात लिहिले आहे की, “ऋषी आणि संतांना ज्ञात असलेला सनातन धर्म आणि शुद्ध हिंदू धर्म (क्लासिकल हिन्दुइज्म) हे हिंदुत्वाचे असंस्कृत स्वरूप आहे. हे सर्व पॅरामीटर्स, इसिस आणि बोको हराम सारख्या गटांद्वारे अलीकडील वर्षांच्या जिहादी इस्लामची राजकीय आवृत्ती आहे.”