वाशिम : २९ ऑक्टोबर – रस्ता खराब असल्याच कारण सांगत रुग्णवाहिकेच्या चालकाने अवघ्या तीन दिवसाच्या बाळंतीण महिलेला लहान चिमुरड्यासह अर्ध्या रस्त्यात सोडल्याची धक्कादायक घटना वाशीम जिल्ह्यातील रिसोड तालुक्याच्या गणेशपूर गावात घडली आहे. या घटनेमुळे संपूर्ण परिसरात खळबळ उडाली असून पोलीस तपास सुरू आहे.
गणेशपूर येथील उषा सावंत ही महिला प्रसूतीसाठी २४ तारखेला वाशिमच्या जिल्हा सामान्य रुग्णालय इथं दाखल झाली होती. बाळंतपण नैसर्गिक पद्धतीने झाल्यानंतर कन्यारत्न जन्माला आले. त्यानंतर २६ तारखेला डिस्चार्ज मिळाला. मात्र, या गावाला जोडणारा रस्ता खराब असल्याचं कारण सांगत १०८ / १०२ क्रमांक द्वारा रुग्णसेवा पुरवणाऱ्या रुग्णवाहिकेच्या कंत्राटी चालकाने या महिला व त्यांच्या चिमुकलीसह सहकारी असलेल्या महिलेला भर रस्त्यात खाली उतरवले आणि इथून पुढचा प्रवास तुम्ही करा असं सांगितलं.
मात्र, शासन नियमाने प्रसूती झालेल्या महिलेला बाळासह त्यांच्या घरी सोडण्याची जबाबदारी रुगवाहिकाच्या चालकाची असते. हे या रुग्णवाहीकेच्या चालकाला सांगितले आणि घरी सोडण्याची विनवणी केली. पण रस्ता खराब असल्याचं कारण सांगून भर रस्त्यात अर्ध्यावर सोडून चालक निघून गेला. सावंत परिवार अर्धा किलोमीटर पायी चालल्यानंतर मागून येणाऱ्या एका वाहनाने महिलेला आधार देत माणुसकी दाखवत गावात नेवून सोडले.
चालकाने तुमचे रस्ते खराब आहेत, तुम्ही आमदार-खासदार यांना बोला असं उत्तर दिल्याचा आरोप रुग्ण महिलेच्या नातेवाईकांनी केला आहे. अशा संतापजनक घडलेल्या प्रकाराबद्दल वाशिमचे जिल्हा शल्य चिकित्सक डी.बी खेडकर यांनी घडलेला प्रकार निंदनीय असून त्या कंत्राटदार कंपनीला पत्रव्यवहार करून त्या चालकाला कमी करणार असल्याचं सांगितले.
