भंडारा : २० ऑक्टोबर – भंडारा जिल्ह्यातील साकोली पोलीस स्टेशनला सासऱ्याने सुनेवर अतिप्रसंग केल्याची तक्रार दाखल करण्यात आली आहे. ऑक्टोबर २०१० साली झालेली ही घटना सुनेच्या आत्महत्येच्या प्रयत्नानंतर उघडकीस आली. या घटनेची तात्काळ दखल घेत पोलिसांनी पीडित महिलेच्या सासू, सासरा अणि नवर्याला अटक केली आहे.
मिळालेल्या माहितीनुसार, फिर्यादीचे वय पंचवीस वर्षे असून तिचे २०१९ ला लग्न झाले. नवरा नागपूर येथे शासकीय कार्यालयात नोकरीवर असल्याने पत्नीला गावीच ठेवले होते. घरी सासू आणि सासरेसोबत राहत असे. २०२० ला दहाव्या महिन्यात सासर्याने सुनेला घरी एकटे पाहून तिच्यावर अतिप्रसंग केला. आपल्यावर झालेल्या अत्याचाराची माहिती पत्नीने नवऱ्याला दिली. परंतु, परिवाराची बदनामी होईल असे बोलत चुप राहण्यास बाध्य केले.
तेव्हापासून सासू, सासरे आणि नवरा या तिघांनी तिचा तिरस्कार करणे सुरू केले अणि मानसिक रुग्ण आहे असे बोलून शिवीगाळ करणे शुरू केले. या दरम्यान, झालेल्या भांडणातून सासऱ्याने तिला तू वेश्या आहेस अशी शिवीगाळ केली. या सगळ्या त्रासाला कंटाळून फिर्यादीने कीटकनाशक द्रव्य प्राशन करून आत्महत्या करण्याचा प्रयत्न केला.
प्रकृती बिघडल्याने तिला साकोली येथील उपजिल्हा रुग्णालयांमध्ये भर्ती करण्यात आले. फिर्यादीने दिलेल्या माहितीवरून आरोपी नवरा, सासरा, सासू यांचे विरुद्ध कलम ४९८, ३७६, ३०६, ५११ भादवी गुन्हा नोंद करून त्यांना पोलिसांनी अटक करून पुढील तपास पोलीस निरीक्षक जितेंद्र बोरकर यांच्या मार्गदर्शनात पीएसआय मनोज मेश्राम करीत आहेत.
