नागपूर : २८ सप्टेंबर – खापरखेड्यातील चनकापूर येथील बनावट दारूनिर्मिती कारखान्यावर छापा टाकून पोलिसांनी दोघांना अटक केली. विशाल शंभू मंडल (वय २५, रा. चनकापूर कॉलनी) व मिथुन महादेव शहा (वय ३३, रा. चनकापूर वॉर्ड क्रमांक एक) अशी अटकेतील आरोपींची नावे आहेत.
चनकापूर परिसरात बनावट दारूनिर्मितीचा कारखाना सुरू असल्याची माहिती खापरखेडा पोलिसांना मिळाली. पोलिस अधीक्षक राकेश ओला यांच्या मार्गदर्शनाखाली खापरखेडा पोलिस स्टेशनचे वरिष्ठ पोलिस निरीक्षक पुंडलिक भटकर, हेडकॉन्स्टेबल उमेश ठाकरे, आशिष भुरे, दीपक रेवतकर, राजकुमार कानफाडे, प्रमोद भोयर, दिलीप पटले, मुकेश वाघाडे, नुमान शेख व राज्य उत्पादन शुल्क विभागाच्या अधिकाऱ्यांनी कारखान्यात छापा टाकला. पोलिसांनी दोघांना अटक केली. पोलिसांनी बनावट दारूनिर्मितीसाठी वापरण्यात येणारे रसायन, दोन मशिनी, देशी व विदेशी दारूचे लेबल, १५ पोती रिकाम्या बाटल्या आदींसह सुमारे १७ लाखांचे साहित्य जप्त केले. गेल्या महिनाभरापासून हा कारखाना सुरू होता, अशी माहिती आहे.