पाटणा : २६ सप्टेंबर – बिहारच्या चिरैया विभागातील शिकारगंज पोलीस ठाण्यांतर्गत सिकरहना नदीत एक नाव उलटल्याने २२ जण बुडाल्याची भीती व्यक्त केली जात आहे. बुडालेल्यांपैकी ६ जणांचे मृतदेह बाहेर काढण्यात आले आहेत. उर्वरित लोकांचा शोध सुरू आहे. नावेतील जण जनावरांसाठी चारा काढण्यासाठी सरेहला दिशेने जात होते. यावेळी नाव उलटली आणि अपघात झाला. घटनास्थळी मोठ्या संख्येने नागरिकांनी गर्दी केली आहे. त्याचबरोबर पोलीस आणि पचाव पथकाच्या जवानांच्या मदतीने बुडालेल्यांचा बाहेर काढण्याचे प्रयत्न सुरू आहेत.
नाव उलटून २२ हून अधिक जण नदीत बुडाल्याची माहिती मिळताच गावकरी नदीच्या दिशेने धावत सुटले. यानंतर स्थानिक प्रशासन आणि पोलिसांना घटनेची माहिती देण्यात आली. सर्वप्रथम स्थानिक बचाव पथक घटनास्थळी दाखल झाले. बेपत्ता नागरिकांचा शोध घेतला जात आहे. दुसरीकडे गावकऱ्यांनी आपल्या नातलगांसाठी टाहो फोडला आहे.
पावसाळ्यात नाव उलटण्याच्या घटना वाढल्या आहेत. यात अनेकांचा जीव गेला आहे. काही दिवसांपूर्वीच समस्तीपूरमध्ये नदीत एक नाव उलटली होती. यात अनेकांचा बुडून मृत्यू झाला. अशाच प्रकारे काही दिवसांपूर्वी छपरामध्ये गंगा नदीत नाव बुडाली होती. या नावेत अनेक मजूर होते. क्षमतेहून अधिक नागरिक नावेत असल्याने ती उलटली होती.
