मुंबई : १९ सप्टेंबर – भाजप नेते आणि माजी खासदार किरीट सोमय्या यांना कोल्हापूर दौऱ्यावर निघण्याआधीच मुंबईत मुलुंड येथील निवासस्थानी स्थानबद्ध करण्यात आले आहे. सोमय्या यांना कोल्हापूर जिल्हा प्रवेशास मनाई करण्यात आली असून नोटीस घेऊन पोलीस सोमय्या यांच्या घरी दाखल होताच वातावरण चांगलंच तापलं आहे. या कारवाईवर सोमय्या यांनी आक्षेप घेतलाच आहे शिवाय विरोधी पक्षनेते देवेंद्र फडणवीस आणि प्रवीण दरेकर यांनीही कारवाईचा निषेध केला आहे.
राज्याचे ग्रामविकास मंत्री आणि राष्ट्रवादी काँग्रेसचे नेते हसन मुश्रीफ यांच्यावर किरीट सोमय्या यांनी घोटाळ्याचा आरोप केला आहे. या अनुषंगाने अधिक माहिती घेण्यासाठी सोमय्या हे उद्या कोल्हापूरमधील कागल येथे जाणार होते. मात्र, त्याआधीच कोल्हापूरच्या जिल्हाधिकाऱ्यांनी प्रतिबंधात्मक आदेश जारी करत सोमय्या यांना जिल्ह्याच्या हद्दीत प्रवेश करण्यास मनाई केली आहे. या आदेशाची प्रत घेऊन पोलीस मुंबईत मुलुंड येथील सोमय्या यांच्या निवासस्थानी दाखल झाल्याने वातावरण चांगलेच तापले आहे. सोमय्या यांना स्थानबद्ध करण्यात आल्याचे वृत्त असून या कारवाईवर त्यांनी तीव्र आक्षेप घेतला आहे.
मी गणेश विसर्जनासाठी जाऊन नंतर महालक्ष्मी एक्स्प्रेसने कोल्हापूरला रवाना होणार आहे. मात्र मला रोखले जात आहे. गृहमंत्री दिलीप वळसे पाटील यांनी मला अटक करण्यासाठी डझनभर पोलीस पाठवले आहेत. अशाप्रकारच्या कितीही कारवाया केल्या आणि मला डांबून ठेवले तरी मी तुमचे घोटाळे बाहेर काढतच राहणार आहे, असा इशारा सोमय्या यांनी दिला. सोमय्या हे कोल्हापूरला जाण्यावरही ठाम आहेत.
दरम्यान, विधानसभेतील विरोधी पक्षनेते देवेंद्र फडणवीस यांनी सोमय्या यांच्यावरील कारवाईचा निषेध केला. ‘किरीट सोमय्या यांना स्थानबद्ध करण्याची कारवाई पूर्णपणे बेकायदेशीर आहे, त्याचा आम्ही निषेध करतो. राज्य सरकारविरुद्ध आमचा संघर्ष सुरूच राहील’, असे ट्वीट फडणवीस यांनी केले आहे. ‘ही तर ठाकरे सरकारची मुस्कटदाबी’, अशा शब्दांत विधान परिषदेतील विरोधी पक्षनेते प्रवीण दरेकर यांनीही या कारवाईवर तीव्र प्रतिक्रिया दिली.
