पाटणा : ३ सप्टेंबर – राष्ट्रीय जनता दलाचे आमदार गोपाळ मंडल यांचा रेल्वे प्रवास चांगलाच चर्चेत आलाय. राजेंद्र नगर (पाटणा) हून नवी दिल्लीला जाताना ‘तेजस एक्सप्रेस’द्वारे आमदार मंडल प्रवास करत होते. रेल्वे प्रवासादरम्यान अंडरवेअर आणि बनियानमध्ये ते रेल्वेच्या मोकळ्या जागेत फिरताना दिसले. यावर काही प्रवाशांनी आक्षेप घेतला असता आमदार महाशयांनी माघार न घेता उलट प्रवाशांना शिवीगाळानं प्रत्यूत्तर दिलं.
रेल्वेमध्ये इतर रेल्वे प्रवासी आणि आमदार गोपाळ मंडल यांच्यात जोरदार बाचाबाची झाली. हे भांडण इतकं वाढलं की रेल्वेत स्कॉर्ट करणारी आरपीएफ टीमही दाखल झाली. त्यांनी आमदार आणि इतर प्रवाशांना समजावण्याचा प्रयत्न केला.
राजेंद्र नगरहून नवी दिल्लीला निघालेली ‘तेजस एक्सप्रेस’ या भांडणा दरम्यान दिलदारनगर स्टेशनवरून पुढे निघाली होती. या घटनेला आरपीएफकडूनही दुजोरा देण्यात आलाय.
तेजस एक्सप्रेसच्या ए-१ कोचच्या सीट क्रमांक १३, १४ आणि १५ वरून गोपाळ मंडल आपल्या सहकाऱ्यांसोबत प्रवास करत होते. तर दुसरीकडे, जहानाबादचे रहिवासी असलेले प्रल्हाद पासवान हे आपल्या कुटुंबासमवेत ए-१ कोचच्या सीट क्रमांक २२-२३ वर होते. अर्थातच, या डब्यात काही महिला प्रवाशांचाही समावेश होता. दोघांचंही तिकीट पाटणा जंक्शन ते नवी दिल्लीपर्यंत होतं.
जेडीयू आमदार गोपाल मंडल रेल्वेच्या कोचमध्ये कपडे उतरवून केवळ बनियान आणि अंडरवेअरमध्ये बसले होते. कोचच्या मधल्या पॅसेजमधून ते याच अवस्थेत रेल्वेच्या टॉयलेटच्या दिशेनंही गेले. आपल्या सीटवर परतत असताना प्रल्हाद पासवान यांनी रेल्वेच्या डब्यातून प्रवास करणाऱ्या महिला प्रवाशांचा हवाला देत गोपाल मंडल यांच्या कपड्यांवर आक्षेप व्यक्त केला.
मात्र गोपाळ मंडल काहीही ऐकून घेण्यास तयार नव्हते. त्यांनी इतर प्रवाशांना शिवीगाळानं प्रत्यूत्तर दिलं. त्यामुळे हा वाद आणखीन वाढला. हा वाद एवढा वाढला की रेल्वेतील आरपीएफ टीमनं पंडित दीनदयाल उपाध्याय जंक्शनच्या रेल्वे पोलिसांना याबद्दल सूचना दिली. या स्टेशनवर रेल्वे दाखल झाल्यानंतर उत्तर प्रदेशच्या रेल्वे पोलिसांनाही या प्रकरणात हस्तक्षेप करावा लागला.
मिळालेल्या माहितीनुसार, गोपाळ मंडल यांच्या कपड्यांवर आक्षेप घेणाऱ्या प्रवाशांनी या प्रकरणाबद्दल कोणत्याही प्रकारे लेखी तक्रार दाखल करण्यास नकार दिला. मात्र, आमदार महाशयांचे या अवस्थेतील फोटो सोशल मीडियावर व्हायरल झालेत.
